陳豪孤單過中秋
陳豪昨出席活動，被問到今年會否與太太陳茵媺（Aimee）過婚後首個中秋節？他表示二人屆時會分隔兩地：「香港同加拿大有時差，佢起身我就瞓覺，但會盡量保持聯絡。」問Aimee下月中還是下月尾回港？陳豪一概以「到時再通知」作回應。至於會否到加拿大接老婆回港，陳豪說：「唔得，拍緊電影。（準備好BB用品未？）有四圍睇，但已經收到好多禮物。（收到粉紅色定藍色禮物多？）哈哈哈，係男女都啱用。」
問陳豪未能跟老婆過中秋會否不開心？他謂最重要是老婆能在舒適安靜環境下安胎，還甜絲絲說：「佢係最靚媽咪！（佗女先靚喎？）唔知喎！仔女都無所謂，最緊要健康。Aimee健康同氣色都好好。（視像見面？）耐唔耐都有。」問陳豪覺得自己將來會否成為怪獸家長？他自言開通，不會給小朋友壓力。
而在加拿大安胎的Aimee，在微博上載一張流浪貓相，並留言：「我爸爸屋後園住了十幾隻流浪貓，有時我哋會餵佢哋食嘢。呢隻貓貓就係其中一隻喺窗外等待緊食物，我愛死佢哋呀！」