祖兒叉足電 操弗迎個唱
天后容祖兒（Joey）早前與男友劉浩龍（師兄）到美國學跳舞兼拍拖旅遊，昨日她戴住寫有「HOLLYWOOD」字樣的頭飾舉行簽名會，回憶起與師兄外遊的時光表現甜到漏，現時充滿能量的Joey將操弗準備年尾的個唱！
樂壇天后容祖兒昨日到屯門V city為其新專輯《Little Day小日子》舉行簽名會，現場派發了一千張簽名籌，中秋將至，歌迷即場親手設計和製作燈籠送給Joey，又預祝Joey年尾的10場跨年《1314容祖兒演唱會》場場爆滿。
中秋難見師兄
台上Joey與司儀分享為個唱keep fit的心得：「我鍾意跑步，跑半個鐘，唔好食消夜，（賞月一定係消夜。）食一晚都得嘅，咁開心要食嘅，之後努力啲。」最後新鴻基地產代理助理總經理（租務）孫雅茵向Joey送上一張巨型「Queen」啤牌，代表Joey的樂壇天后地位。
Joey透露已與家人食飯提早慶中秋，而中秋原本有工作又臨時取消，問她可會和劉浩龍撐枱腳？她說：「我覺得快樂就得，唔使鋪張，不過都冇得食，因為佢唔喺香港。」
Joey早前與師兄到美國旅遊兼學跳舞，她昨戴住一個有「HOLLYWOOD」字樣的頭飾示人，她坦言很想念在美國的日子：「同香港完全唔同，係放假嘅好地方，以前去東京只掛住買嘢，搞到自己好忙，洛杉磯好舒服。（掛住同師兄拍拖同接放學？）冇人跟就最開心最free。（同師兄最free做過咩？）一般生活會做嘅嘢，喺香港冇咩係做到。」
擬英國揀歌衫
提到籌備個唱，Joey笑言進度「四四五五」，但希望稍後有機會與潮人黃偉文飛往英國揀歌衫，她強調並非去偷懶，只希望揀選更多靚衫與觀眾分享，Joey又說想找張家輝的健身教練幫手，有人提議叫師兄操一身肌肉上台做嘉賓，她說：「係咪叫佢開演唱會仲好？」
文：音樂組