張慧儀攬囝奮鬥 闖生天

拍劇宣傳生意

我同曾志偉不時有聯絡，最近佢打嚟，問我有冇時間返香港拍無綫新劇《M Club》（前名《Aerobic Girls舞室保衛戰》），當時我停咗10秒，因為呢個Timing令我諗到好緣！我1993年嚟香港入影視圈，2003年因為結婚不成離開呢個傷心地，2013年有人搵我返嚟，真係估唔到，志偉話佔時間唔多，我爽快答應，諗深一層，對自己生意宣傳上都有幫助，雙贏局面幾好。

養子醫藥費貴

不過，返嚟幕前又要承受「拍劇賺錢養仔」嘅負面新聞，雖然無綫對我唔差，但眾所周知，喺香港拍劇可以賺到好多錢咩？領養Hanson返嚟，供佢入讀國際學校，每年學費都10幾萬，佢因先天性心臟病要定期睇醫生做手術，出入醫院，每年都使10萬、8萬啦。為咗Hanson，我呢幾年努力建立自己事業，萬事起頭難，做推銷冇人吼、冇人理，我都咬實牙關捱過去，堅持係因為一份責任，係Hanson將我喺人生低潮拯救出嚟。

今次與幾位女星拍劇，可讓慧儀過足戲癮。（資料圖片）

慧儀曾經歷低潮，但難關已一一捱過。

情變一鋪清袋

10年前發生失婚事件（與未婚夫、拉丁舞王霍紹裘情變），輸到乾乾淨淨。嗰段時間，係我人生最低潮，只想離開香港，去一個冇人識我嘅地方再生活。當時揀咗去北京，嗰度我一個朋友都冇，最初好辛苦，為咗生活，攞住6罐果醬不停周圍敲門推銷都冇人吼，好似做戲，好折墮。

生意曾跌谷底

我同自己講，只要搵一個經銷商就夠，所以堅持到底。到2006年，喺「平安之家」遇上Hanson，我哋雙依為命，只靠推銷果醬嘅收入唔夠生活，惟有諗辦法拓展事業。當年投資嘅印刷廠又冇生意，生活好徬徨、好驚，於是用咗兩星期做人生第二個抉擇，由北京南移到廣州生活，同樣地，廣州我一個朋友都冇，但我有信心去拚，因為Hanson畀到我一份推動力。

放下形象推銷

重新開始時，首先放低藝人形象，繼續我嘅推銷生涯，見客時要挑通眼眉，健康食品唔啱，就轉賣保健產品，再唔啱就轉護膚產品，總之我帶齊產品迎合需要。記得有一次，我開緊會，期間抽時間湊Hanson放學，然後喺車餵佢食飯，之後又趕去開會，Hanson喺架車度畫畫等我。直至夜晚九點，我抱住Hanson返屋企瞓，嗰個階段依家諗番，感觸萬分。我一手孭手袋，一手抱住個仔，仲幫佢孭書包，當刻悲從中來，眼淚直流，人哋話我：「明星嚟o架！你做乜搞到自己咁？」

個性漸變堅強

我啲朋友話Hanson遇到我好彩，其實係我好彩至真！上帝畀我遇到佢，令到我人生價值觀改變，變得堅強，呢個先係我最保貴嘅得着。

賣家傳果醬起家

10年前隻身由香港飛往北京的張慧儀，由女藝人變了女強人。起初慧儀為了生活，放下身段轉型推銷家族傳落的果醬，收入足以餬口，但收養患病養子後，就要開拓事業賺取生活費。

之後慧儀以個人推銷技巧，成功將港式甜品店「許留山」引入內地十多個城市，直至去年，慧儀更在廣西做參茸禮品生意，貨品主要是西藏冬蟲草及馬來西亞燕窩等高檔貨，她現有10多名員工，一年間已見成績，成為不少大企業客戶送禮的好幫手，在其公司網頁可見完善的配套及訂購資料。