周秀娜多人追:鍾意我體味
性感女神周秀娜自年初怒斬與陳偉成（Avis）的六年情絲後，昨日被《好報》踢爆有新歡，夜擒內地高富帥。娜姐昨日風騷承認多異性追求，兼爭住投資其搞的香水生意，她笑謂︰「佢哋鍾意我體味啩！」
今年一月，周秀娜狠撇拍拖六年的花心男友Avis，其後寄情工作北上搵人仔。Dry足九個月的娜姐終有着落，昨日被《好報》踢爆秘密搭上從事科網生意的內地溫姓男子，二人在北京摸黑調情，情到濃時娜姐更攬實對方送波餅。Avis亦不愁寂寞，拖新歡尹蓁晞（Yumi）試大床時恩愛咀嘴。
讚男方靚仔
娜姐於北京街頭拍拖斷正，昨日她接受電話訪問時仍堅稱單身，但冧爆大讚對方︰「又靚仔又事業有成，係好嘢，任何一個努力追求我嘅男仔都有機會。我只係知自己努力工作，男朋友嘅嘢，我要佢哋接受到女朋友忙到冇時間陪自己先算啦。」她又稱︰「嗰晚難得同朋友食飯，飲多咗少少，佢扶一扶我。（攬到好實喎！）大家好耐冇見。」但她不願多談新歡背景。
對於有指娜姐多人追求，並打本給她經營香水生意。娜姐笑言︰「可能佢哋鍾意我啲體味啩！窈窕淑女，君子好逑。總知依家唔心急，慢慢揀。」問是否對香港男士失信心而轉嗒內地男？她說︰「咁啱人夾人，夾到咪一齊，冇話特別去邊搵另一伴。」對於舊愛Avis與Yumi恩愛試大床，她不欲多談地說︰「大家有大家生活，佢哋嘅嘢我冇回應。」
舊愛送祝福
另外，Avis昨日於微博上載與Yumi出海玩的合照，他接受電話訪問時得知娜姐有新歡時稱︰「吓？係咩？恭喜佢，如果係真嘅話，我都希望佢幸福快樂。我同佢嘅嘢都過咗去，唔想再講。」
文︰專案組