張文慈壽星行運放膽尋愛
月尾生日的張文慈（Pinky）踏入生日月，自覺相當幸運，不但接job接到手軟，更獲邀欣賞偶像劉曉慶在港演出的舞台劇。談到偶像再婚，Pinky羨慕非常，直言為自己樹立了榜樣：「年紀唔重要，最緊要係保養得宜，同埋勇於追求自己幸福。」
張文慈與吳彥祖及江若琳同樣生於9‧30，踏入生日月，Pinky接獲多個登台工作，生日當天更會飛上海出席活動，難怪她興奮表示：「可以乘機留幾日，搵繆非臨同契女慶祝吓，都好耐冇見佢哋。」
難忘生日收花束
問到Pinky最印象深刻的一次生日，她說：「讀書時男朋友搞咗個驚奇派對，喺架車收埋咗束花囉。」談到生日願望，Pinky謂希望身體健康及工作順利。
最近Pinky獲鄭明明邀請，11月將到武漢出席美容活動，有指屆時大會會向她頒發一個獎項。談到keep fit之道，Pinky笑說：「坦白講，以前好憎過生日，覺得自己又老咗一歲，但依家成熟咗，覺得只要保持活力，無論內在同外在都唔好放棄自己，人生活得精彩比較重要，我依家keep到咁都好自豪o架。」
出席偶像慶功宴
Pinky亦透過鄭明明認識了內地藝人劉曉慶，劉曉慶最近來港演出舞台劇，Pinky獲邀成為座上客，更出席了慶功宴。對於劉曉慶近60歲再披嫁衣，Pinky直言：「佢簡直係女人嘅偶像，做人要放膽追求屬於自己嘅幸福。佢活得咁精彩，我相信我都可以，其實我仲有半世人未過，我好有寄望o架。」
文：影視組