陳少寶呻栢芝最難搞
入行40年的陳少寶（小寶）下月將首次舉行棟篤笑，更誇下海口要做第二個黃霑！曾經捧紅不少紅星的他又大嘆張栢芝難搞，當年以勢如破竹姿態殺入影圈的栢芝拒絕做碟，要小寶低聲下氣氹她才肯錄歌出碟。
曾經一手捧紅王菲、張國榮、Beyond等人的陳少寶，回想在芸芸合作歌手中，只有一位令他最頭痕：「真係難搞嘅得張栢芝，賣碟同簽一套戲嘅合同比較，蚊同牛比。你同佢攞期出唱片，佢會諗賣得幾多隻？一萬張都賺得好少錢，咁不如比個期電影。佢同時接緊4、5套戲，我要佢畀個期我做記招、唱片宣傳，佢梗係唔制啦。」
小寶直言要氹栢芝，對方才肯度期出碟：「佢試過好氣憤咁同我開會，我明佢嬲咩，咪解釋畀佢聽唱片就係咁做o架喇，但佢喺我度啲碟係最賣得嘛。結果做完嗰3隻碟之後，佢就冇唱，亦冇去其他公司再唱。」
惹官非無奈引退
十年前，當小寶雄心壯志地準備力捧麥浚龍（Juno）時，卻惹上官非，其後更令他退出唱片界，他坦言對那期藝人有一份歉疚：「嗰時簽咗好多個，Juno、2R、張敬軒，軒仔啱啱紅咗我就出事。嗰時公司想發展條young line，諗住擺晒呢啲人落去，但係發生咗咁嘅事，對大家唔住，簽得人就要負責。」此事可會是一個心結？小寶淡然地說：「冇心結，上帝安排我犯官非咪犯官非，但Juno最紅嘅時間的確喺我嗰度。」
下月首開棟篤笑
輾轉十年，小寶決定再次發揮點石成金的能力，力捧另一新星，就是他本人！十月將舉行首個棟篤笑的他大口氣說：「我見好多人開過，我入行40年，心諗輪都輪到我開啩？我嘅觀眾群唔會年輕，所以我企圖做一個大家諗起我會開心、40歲以上人物，我希望做到第二個黃霑。」
文：音樂組
場地：金不換泰國餐廳