劉心悠真性情爆粗出氣
「宅男女神」劉心悠雖然外表弱質纖纖，不過現實中的她卻相當男仔頭，日前她接受主持人陸浩明的訪問時，她就表示曾為不公平事爆粗，又透露其夢想婚禮是可身穿拖鞋和牛仔褲，認真估你唔到！
劉心悠日前接受主持人陸浩明（6號）的邀請，擔任無綫節目《6號訪》的嘉賓！出身於台灣的心悠自2005年來港發展，現時已操得一口流利的廣東話，甚至對於港式粗口都能聽懂！雖然心悠外表斯文，不過當被6號問到會否因為一些事情講粗口時，真性情的心悠即點頭直說：「我曾經講過關於呼吸嘅粗口，譬如我排緊隊畀人打尖，我就會覺得唔公平，跟住我會同佢講『我嚟先』，如果佢唔理我嘅話，我就會等佢走咗先講粗口！」
6號打聽浪漫事
心悠貴為「宅男女神」，6號當然也要滿足一眾宅男，問及她關於愛情的問題：「你喺愛情上做過最浪漫嘅係咩呢？」心悠即回想起讀書年代，並說：「我記得當時男朋友喺第二個省讀緊書，我就偷偷哋打工儲錢買張機票，飛過去畀驚喜佢！我之前仲要未去過嗰個地方，跟住我去到機場打電話畀佢，佢覺得好開心！」
承認自己好難追
雖然心悠現時仍單身，不過被問到是否很難追求，她即斬釘截鐵說：「係！同埋我唔相信『追』呢件事！我唔係一個會跟一般邏輯去行嘅人，我覺得求婚唔一定係男人跪喺地下，甚至我夢想嘅婚禮，都唔係想着婚紗，而係着牛仔褲、拖鞋，哈哈！」
文：專案組
攝影：沈健程