鄧建明顧芮寧奏出火花
鄧建明（Joey Tang）近日與內地女創作新人顧芮寧（Elaine）合作創作新歌《我只需要知道》，但原來兩人早在4年前就開始擔任譚詠麟（阿倫）世界巡唱的結他手，培養了相當的默契和火花，更被阿倫譽為「結他神鵰俠侶」！
Joey早於4年前已在阿倫的巡唱綵排與Elaine相識，當時已覺她很勤力：「佢一嚟已經準備好晒，又好學，成日問我點彈，我當然都好肯教佢，教識佢我又可以做少啲。」Elaine初初以為Joey會很cool，但後來發現他很熱情，又對後輩很照顧，經常都會指導她一些有關演出的細節，令她大感窩心。
盡展南北風格搖滾
Joey認為今次「結他神鵰俠侶」合作，是北方和南方兩種不同風格搖滾樂手的交融：「北方人諗啲嘢係比較豪邁啲，我哋新歌《我只需要知道》係講就算有咩唔開心，一攞起結他就會有安慰，結他就係我哋嘅旗幟，首歌一開頭段solo你就睇到嚟自北方嘅Elaine嗰份豪邁，相反我哋南方人就比較着重個旋律同編曲嘅細緻位。」
Elaine形容自己懷有「女漢子」的豪邁性格，而這種特質亦體現在她的一頭短金髮上，但她自爆剛認識Joey的時候仍留有長頭髮，不過隨着每次演出就愈剪愈短，原來這是譚校長的建議，Elaine說：「因為校長覺得短髮會型一點，可以表現到最high。」
灌錄廣東歌錄到喊
作為北方人的Elaine今次竟敢挑戰廣東歌，她笑言：「要不斷挑戰自己，但原來真的很難，我也很期待有第二次機會再唱廣東歌。」身為監製之一的Joey大爆今次錄音錄足廿個鐘，Elaine更錄到喊，他說：「因為初頭Elaine唔明點解要唱得咁正，佢又好少真係入錄音室，不過最後成果都好滿意，比起我以前啲廣東歌已經好好多。」
採訪：音樂組 攝影：謝國華
髮型：Billy Choi@Hair Culture（Joey）、Brian Chiu@P.O.P eight（Elaine）
化妝：Kei Kei（Joey）、 Anna@Zing makeup school（Elaine）
服裝：Koyo Jeans（Elaine）
場地：通利琴行