娜姐嗒糖自薦嫁鎮宇
周秀娜與吳鎮宇等昨日出席化妝品店開幕禮，鎮宇在場成為「被集郵」對象，連娜姐也嗒糖，說很喜歡鎮宇以前在電影《古惑仔》演的角色o靚坤，並說自己有o靚坤的沙聲，最啱做o靚坤嫂。
陳法拉、徐子珊、周秀娜及吳鎮宇等，昨日到銅鑼灣為「莎莎亞太區首間概念店SaSa Supreme開幕典禮暨慶祝酒會」任嘉賓，同場還有蔡志明夫人、何超盈、陳百祥、陳家樂及冼色麗等，楊受成及甄子丹夫婦等則送上花籃祝賀。
鎮宇購物求升值
穿低胸裙的娜姐坦言對鎮宇嗒糖，但苦無機會影合照，她說：「今日最開心係見到Sam哥，其實我冇睇《衝上雲霄II》，冇時間，唔怕你哋話我out，鎮宇喺我心入面仍然停留喺o靚坤（電影《古惑仔》角色）時代，我好想做佢老婆，因為我把聲都幾o靚坤（沙聲）吖。」
鎮宇則指挾《衝II》勢頭，本月已出席了三場活動，但謙稱收入仍沒有七位數，問他會否效法張智霖買豪宅，他說：「我能力只夠買村屋。（咁謙？）咁係事實，唔通我話我睇中天比高，將會收購周星馳咩？」
鎮宇又稱只會買具升值潛力的酒、手錶及茶葉等以獎勵自己，他說：「千祈唔好畀我老婆知我又買咗條木珠手鍊，如果佢乜都畀我買，我依家已經做咗富豪！」
子珊法拉鬥露背
露背的子珊否認性感搶鏡，對主演的新劇《神鎗狙擊》收視暫未如《衝II》，子珊希望外界不要給予太大壓力，又笑言同劇演員生得高大，演女警的她只好穿高踭鞋上陣帶隊。同穿露背裝的法拉則重申仍未落實簽約新經理人，希望先想清楚發展方向再決定，又謂不會自組公司，因自己沒這種能力，只想專心演戲。
文：影視組