側田捧餐做阿四服侍女友

側田與韓國女友相戀三年，感情穩定，前日兩人拍拖到銅鑼灣撐枱腳，一向對女友呵護備至的側田，更自動波做阿四為女友捧食物，而女友則做「低頭族」坐低篤電話，期間巧遇黃宇詩，側田即介紹女友給對方認識。
側田（右）與女友現身銅鑼灣一商場行街街。
側田（右）與女友現身銅鑼灣一商場行街街。

現年37歲的側田，出道以來負面新聞多多，曾是夜蒲一族的他，自結識現任韓國女友後，修心養性不少。在11年初，他突然暫別香港樂壇，與友人到北京定居發展，但因內地競爭太大，去年底又回歸香港。側田與女友雖只拍拖三年，但早已認定為結婚對象，早前在演唱會上對女友大唱冧歌，Sweet到爆！

低頭族篤電話

前日約下午5時，戴帽及黑超的側田，與身穿背心、短裙的女友，前後腳現身銅鑼灣一商場，雖然二人無親熱動作，但側田不時回望女友，其後又到附近餐廳醫肚。甫進店內，兩人即走到放蛋糕的雪櫃前研究，其後女友自行搵位坐低，而側田就負責買食物和飲品，等候期間，女友全程耷低頭玩電話。

側田（左）與韓國女友於餐廳醫肚。
  • 側田（左）與韓國女友於餐廳醫肚。
側田自動波去買食物，女友就做低頭族玩電話。
  • 側田自動波去買食物，女友就做低頭族玩電話。
同場巧遇黃宇詩（右），未來田嫂（左）邊啜飲品邊望二人傾偈。
  • 同場巧遇黃宇詩（右），未來田嫂（左）邊啜飲品邊望二人傾偈。

遇宇詩企定定

付款後，側田主動為女友捧食物回來開餐，認真廿四孝男友。同場巧遇黃宇詩，側田即介紹女友給對方認識，女友亦起身打招呼，奈何不懂廣東話的「未來田嫂」，只好企在一旁邊啜手上飲品邊望二人傾偈，後來發現記者拍照，側田即轉枱到較入位置與女友繼續開餐。

文、攝：追蹤組