關詠荷囡囡要弟妹養狗仔頂檔
「最佳拍檔」關詠荷、歐陽震華昨日聯同朱晨麗、黃智雯、苟芸慧、章宇昂等為劇集《情逆三世緣》宣傳，並大跳民初舞蹈角逐「東方舞王、舞后」之名，Bobby使出撒手鐧「環抱」關詠荷，對方再拗腰騷美腿，兩人輕易勝出，不過當獲頒儼如港姐的綵帶時，Bobby笑說自己像啤酒妹。
關詠荷被問到之前獨家於《好報》中慨嘆早年曾努力造人，但上天卻冇籌派，造人計劃畫上句號，關詠荷解釋只是不再刻意去想：「我想順其自然，早幾年係好想有，但依家不如放鬆，係咁多就咁多，整定，（流產一事老公張家輝知道？）佢知，呢個要兩個人傾，件事都係生個女前發生，無影響過我哋。」關詠荷又大爆女兒曾想過要弟妹，甚至叫她去領養，但知要分薄父母的愛後，女兒就即改口風說一個人都可以，關詠荷說：「依家買咗狗仔畀佢，佢會當自己係姐姐咁照顧佢哋。」
朱晨麗唔抗拒整容
至於朱晨麗被指似倒模陳法拉，她澄清是因打拳關係才開始瘦，暫時覺得未需要整容：「但我唔會抗拒，（想整邊度？）老咗先知，其實我同法拉傾過，我哋嘅共同點係大家唔似。」另外，章宇昂有份演出的《情》及《衝上雲霄Ⅱ》都收視報捷，他大讚兩位監製製作用心：「我個角色喺兩套劇都好唔同，一個好靜一個就好勇。」章宇昂稱正洽談新劇，問到還想跟誰人合作？他直言是陳法拉。
文：影視組