霆鋒牛一美女送驚喜

向來工作至上的謝霆鋒,前晚上賭船出海通宵拍攝新戲,要在工作中度過33歲生日,導演王晶更安排「晶女郎」吳辰君、童菲及內地女星景甜等美女為他開P送驚喜,難怪昨日中午落船時,霆鋒疲態盡顯。當提起兩個身在加國的兒子如何為他慶祝時,霆鋒即封嘴不談,然後匆匆返家休息。

謝霆鋒與張栢芝離婚兩年,最近有指栢芝帶同兩個囝囝Lucas和Quintus到加拿大溫哥華生活。前晚霆鋒為王晶執導的新戲《賭城風雲》上賭船開工,據知當晚場口不多,拍攝亦相當順利,為免霆鋒33歲牛一冇人陪,導演王晶特意安排「晶女郎」吳辰君、童菲及內地女星景甜等幾位美女,在船上開party唱生日歌、切蛋糕等為他送上驚喜。

一臉疲倦

通頂在賭船拍攝後,霆鋒隨劇組乘接駁船,於昨日中午12時駛回觀塘碼頭,戴黑超、衞衣笠頭的壽星仔霆鋒先落船,隨後亦見導演王晶、監製劉偉強、吳辰君、童菲、內地女星景甜及張晉等。當記者上前祝霆鋒生日快樂時,一臉疲倦的他沒有反應,問到會否慶祝?他表示:「唔會喇,好攰,要返去休息。」問到兩個囝囝會否跟他慶祝?霆鋒即時封嘴不談,之後直接返回位於寶雲道寓所,一直未有外出。

掛住囝囝

約下午4時半,霆鋒媽咪拉姑手持保溫瓶抵達霆鋒家門,問到是否準備了愛心靚湯?她說:「用心煲嘅嘢!」之後獨自搭升降機上樓。其後亦見經理人Mani現身,她表示:「佢乜都有,只係嚟睇吓佢!」事後記者致電霆鋒,他表示不會特別慶祝:「頭先我幾乎瞓着,只係阿媽嚟到令我好surprise。其實我聽朝(即今日)一早就飛長沙。」問到有否掛住囝囝?他說:「梗係掛啦!佢哋前幾日搞學校嘅嘢!(囝囝會在香港定加拿大讀書?)唔講喇。」他亦表示有時間會到加拿大探望兩個囝囝,現已跟經理人度期。

文、攝:追蹤組