熊黛林懶理身形靠擦減壓
都市人壓力大離不開工作或感情，但切勿輕視大壓力這問題，處理不當分分鐘變抑鬱症。減壓方面可做運動、畫畫、食嘢發洩，紓緩情緒，而熊黛林的減壓方法就係懶理身形，不斷食嘢。
熊黛林
「有時見到啲負面報道會唔開心，令到自己好大壓力，所以最好嘅減壓方法就係不停食嘢，令自己唔去諗。」
松岡李那
「最大壓力都係源於工作，好多時做嘢都係前一日先通知我，例如要表演唱歌、跳舞，但係只係得一日時間練，真係令人好緊張、好大壓力。我嘅減壓方法就係唔好諗咁多，不斷重複又重複咁練習，等自己建立信心。」
蔡恩真
「我成日都為咗我嘅將來而覺得好大壓力，最近喺度諗我應唔應該繼續留喺香港發展，因為香港租金好貴。而我減壓嘅方法係做瑜伽，又或者打坐嚟平靜我嘅心靈。」
黃芷晴
「我最大壓力都係喺我啱啱出道嗰陣，因為我係星二代，大家都對我好大期望。喺我拍第一套劇嗰陣，有爸爸黃日華一齊拍，好放心。但到拍第二套劇嗰陣，我要自己一個，真係好緊張，直情瞓唔着同胃痛。我爸爸教我減壓嘅方法係深呼吸，同埋將拍戲當係玩，但係要認真咁樣玩。」
Janice Man
「試過拍《大追捕》時太過投入角色，抽離唔到，令到自己好大壓力，仲三個月唔見人，減壓嘅方法係揸車，仲要開住車窗，吹吓風，清醒啲。」
《Kiehl's活動》
何嘉莉
「感情問題係我嘅弱項，同埋我會將件事睇到好嚴重，搞到自己好唔開心。我覺得如果情緒唔好，可以一個人去睇齣戲，因為睇戲時投入咗去戲入面，可以分散自己嘅負面情緒﹗」
余思敏
「都係感情問題，女仔通常都係因為呢樣嘢，我嗰陣都有去睇醫生，我覺得如果有需要不妨尋求醫生，因為專業意見有時真係可以解開自己心結。」