(13)歐陽巧瑩捧獎 (15)蔡思貝谷戲爆喊

候選港姐(13)歐陽巧瑩雖然是非不斷,但無損在其他佳麗心目中形象,昨日互選「友誼小姐」獎項中成功奪魁。歐陽巧瑩攞獎時表現平靜,反觀(5)朱智賢與(15)蔡思貝竟然爆喊祝賀,認真好戲。

「2013香港小姐競選」廿位候選佳麗昨日齊集無綫電視廣播城,即場互相投票選出「友誼小姐」,最後由是非港姐歐陽巧瑩奪得。她從去年港姐冠軍張名雅手上接過獎項時表現平靜,其他佳麗替她高興得紛紛落淚,當中以蔡思貝最激動,泣不成聲,訪問時需一度中斷。蔡思貝稱與其他佳麗相處好好,但覺得歐陽巧瑩受苦最多:「佢成日都被人話,好多新聞好似針對住佢,個世界好似好殘酷,所以佢得獎戥佢開心。」身為大熱的她很感激外界支持,但自嘲口才有待改進,若有機會都想加入娛樂圈。

否認13歲失身

朱智賢亦喊得相當淒厲,她說:「佢(歐陽巧瑩)好肯為大家,收夜都會幫大家買嘢,係真心嘅,好唔捨得佢。(佢未輸喎!)贏同輸始終一日都會分開,大家經歷咗好多,好難得走到呢一步。(佢多是非。)戥佢慘,見佢成日畀人問一定有好大壓力,見佢撐住好勇敢、堅強,唔係個個女仔做到。」

歐陽巧瑩不覺得自己慘,更不怕被人再爆料。她說:「我冇做錯事,有啲好荒謬同無聊嘅傳聞無中生有,我都唔知點回應。唔會特登介意,只要家人知我唔係咁就足夠。」對於被傳十三歲失身,她說:「好恐怖,超乎我想像,完全冇咁嘅事。十三歲係我人生最巔峰,最肥、有暗瘡、又健壯、膚色又黑,男仔唔會望我同有興趣。」她懷疑得罪過人才被爆料。

另外,昨日有讀者爆料指(17)陳凱琳曾在加拿大整容,是人造美女。而(7)沈桂澄亦被傳小學時已發明星夢,平日行事高調、說話大聲兼愛出風頭,中學畢業後便要選港姐。

文:影視組