徐子珊陳敏之不和浮面

一對「舊敵」徐子珊、陳敏之早前同場時都扮老友,不過昨日在新劇造型上卻「零交流」,直至大合照先焗住傾偈;相反另一對「新仇」胡定欣、黃宗澤就交足戲,全程孖住子珊密密傾!

徐子珊、陳敏之這對「舊敵」以前拍劇集《美麗高解像》時傳不和,昨日為無綫新劇《點金勝手》再次同場,子珊今次有好友相伴,終於不需像拍攝《My盛Lady》時焗住與敏之「交戲」,兩人開始時完全零交流,就連敏之介紹自己角色時,子珊都視對方透明,繼續企埋一邊跟定欣、Bosco細聲講大聲笑。直到影大合照時,原先夾兩人中間的梁靖琪竟好心做壞事調位,二人才無奈扮friend,不過完成即急腳散水!相反Bosco跟定欣就交足戲,定欣更翹實戲中的「老公」Bosco。

嫌黃宗澤年紀細

事後就「零交流」一事致電敏之,她例牌否認並稱不作任何回應,而子珊於現場就醒目地主動揶揄前緋聞男友黃宗澤,實行轉移視線:「我覺得Bosco嘅緋聞多到唔停,版圖就似劏房咁逼,(但你都喺過門口!)我係路過,今次希望同佢有新火花,但堅決謝絕傳緋聞!其實佢年紀細過我,我唔鍾意細路!」而Bosco對「劏房」之言得啖笑,還賣口乖讚子珊是豪宅筍盤。定欣則出口術揶揄Bosco的緋聞:「佢今次可以好安心,唔會同我傳緋聞,(上次都無?)佢有同岑麗香,同我係傳不和嘛。」

鄭俊弘再展歌喉

此外,監製莊偉建昨日於電話訪問中坦言於《星夢傳奇》後才找鄭俊弘參演只想發達的「蠱惑仔」一角,此角甚有發揮,監製更坦言不會埋沒他的天分,劇中都會加插唱歌的場口給他一展所長。而黃智賢於劇中與敏之、江美儀有三角關係,黃智賢透露與敏之屬同居關係,會有適量的親熱戲,更指角色有發揮,故不介意再演警察。

文:影視組