許亦妮取代DaDa 解放35D
陳靜（DaDa）於月初突然在微博宣布退出幕前，逃拍電影《喜愛夜蒲3》，導演錢國偉一怒之下cut去其戲份，改由擁有35D上圍的港姐許亦妮取代女主角位置，情慾戲將與「動L」陳柏宇交手。日前錢導率一眾女演員包括雨僑、許亦妮和夏尉喻（寸嘴Barbie）等先到蘭桂坊視察環境，一行四人出巡如行catwalk，引來途人喪（目及）。
原本由DaDa擔正演出的《夜蒲3》，8月7日歡喜兮兮為電影開鏡，卻在毫無預兆下於8月9日在微博宣布因情緒病要退出幕前，完全未有向劇組交代便失蹤，但事隔幾日她卻「蒲頭」為另一套電影補戲，因此辣慶《夜蒲3》導演錢國偉，正當人人問他會否另覓人選代替DaDa之時，錢導已怒不可遏，不想被翹起，索性改劇本將DaDa一角刪除，短短十日時間「重新洗牌」，找來2011年港姐季軍及最上鏡小姐許亦妮（Whitney）取代女主角位置，戲份與戲中另一女主角雨僑平分春色。
雨僑黐實密密斟
為了讓演員熟習演出環境，錢導上周日晚率一眾女演員包括雨僑、Whitney和寸嘴Barbie等到蘭桂坊視察環境，期間見穿熱褲的雨僑「黐」住錢導密密傾，而Whitney則跟着大夥兒，一行四人在蘭桂坊兜了幾圈，三個靚女落樓梯如出巡般行catwalk，途人都要避埋一邊兼喪（目及），錢導稱原來每次拍《夜蒲》都會視察吓環境，好讓演員可以融入其中，方便拍攝。而昨晚錢導又與另一班「天使」成員陳蕊蕊、劉俐和林芊妤聚餐，三女最近各有新聞，相信又是時候互相傾訴。
今次起用Whitney為女主角，實屬錢導早已心繫，觀其Whitney在《老表，你好嘢！》中「Monica D.」一角，加上她為無綫《Amazing Summer》的廣告片中大晒35D「巨咪」，以上條件放諸《夜蒲》系列可謂極具潛質，奈何當時還有DaDa存在，錢導只好安排Whitney客串演出，如今DaDa逃拍，錢導一於加重Whitney戲份將之「升呢」為女主角。要知道《夜蒲》系列電影以情慾戲見稱，但Whitney屬港姐出身又屬無綫合約演員，形象受到保護，但錢導仍願意作出配合。昨日他受訪時稱不會安排Whitney有裸露鏡頭：「我哋都好尊重無綫嘅，目前仍商討中，今次Whitney只係有限度性感，（情慾戲？）情就有慾就唔多，上一集連詩雅都冇裸露啦！（對手？）陳柏宇，（第一集佢演出有揸胸鏡頭喎？）今集佢兩個嘅戲我都未度好，總之點到即止！」
喜做主角受保護
至於Whitney今次冷手執個熱煎堆擔正女主角，昨受訪時心情興奮：「聽完故事，性感尺度係我個底線，導演應承我一切以靚為主！（DaDa退出造就你升呢？）唔好咁講，只係多咗啲戲，又改咗個故事，所以都唔可以話我取代佢嘅！」而無綫高層樂易玲昨承認Whitney落實演出：「因為冇咗DaDa角色係有變動，許亦妮聽完都接受到嘅咪畀佢試吓，（唔可以有情慾戲？）《夜蒲3》係2B級電影，我哋無綫對旗下藝員係較嚴謹，不過錢導都應承我會作出適當平衡。」
金像女配DaDa Vs 上鏡姣妮Whitney
陳靜
年齡：24歲
三圍：33D、24、34
銜頭：應屆金像獎最佳女配角
情史：陳靜出道初被爆曾與藝人王宗堯及組合Square成員Gary拍拖，2010年因與台灣男子組合AK成員Andy手拖手溜冰而傳出緋聞；翌年則被發現與藝人李雨陽夜遊主題公園，兩人互攬親熱，戀情斷正。去年又被指撻着上海富二代Jiro，至今年初認識一名圈外男友，雙雙拍拖半年。
許亦妮
年齡：24歲
三圍：35D、24.5、34.5
銜頭：2011香港小姐季軍及最上鏡小姐
情史：許亦妮身邊男伴狂轉，除了參選港姐期間被揭有健身公司太子爺男友Elson外，亦曾傳與唐貝詩緋聞男友孔樂勤等13位男士拍拖。
去年被傳與藝人金剛秘密同居，今年亦被拍得在銅鑼灣街頭與一名光頭「白淨金剛」談情。
文：影視組
攝：追蹤組