劉心悠努力尋愛冇著落
劉心悠是不少男士心目中的女神，但女神入行多年始終未有拖拍。心悠透露剛到了蜜月勝地度假，但同行的卻是媽咪，問她會否找個男友再去？她雖表示順其自然，但自爆曾努力識新朋友，無奈對方不體諒她的工作，直言這次經歷令她「失望但不至於傷心」！
宅男女神劉心悠昨日出席瑞士天梭表「160周年環宇遨遊」展覽開幕典禮，心悠透露剛與媽咪從馬爾代夫度假回港：「好少機會同佢去，好甜蜜！（有冇艷遇？）冇呀，嗰度係蜜月地方，通常一雙一對，我同媽咪一齊都開心。」她又笑言今次只穿一件頭泳裝，因同行的媽咪比較保守。
對象圈外人
問心悠會否在馬爾代夫沉沒前找個男友陪她再去？她說：「唔知幾時沉，好大壓力喎，順其自然啦，我有好多工作。（媽咪有冇催你拍拖？）依家唔會催，佢依家嚟咗香港同我住。（好多人追？）大家覺得我多人追，所以咪冇人追囉！」她還自爆在感情上曾「努力過」，但問題不在於自己，再追問她意思是否曾向人表白而被拒絕？她解釋：「唔係，我係努力過識新人（新朋友），但佢哋好少體諒我工作，佢哋係圈外人。（失望？）失望但不至於傷心，緣分未到，唔覺自己要求高。」
情侶檔開工
同場還有緋聞男女洪永城（Tony）和黃翠如，葉蘊儀則擔任品牌郵票設計比賽的評判。談及Tony與翠如近日經常結伴出席活動，Tony笑指二人將會繼續以情侶檔拍攝廣告，但就異口同聲表示不怕變真情侶：「啲人驚我哋打交多啲。」記者即推薦同場的劉心悠給Tony，他就「嘩」了一聲，提到心悠還沒有男友陪她去馬爾代夫度假，問Tony會否盡快追心悠，陪她去馬爾代夫？他笑說：「一係報名同佢跑馬拉松先啦，去馬爾代夫要操到好fit，畀多年時間我哋，跑住愛的馬拉松先。」
文：名人組