甄妮歐陽菲菲 打造女版麟李
殿堂級歌手甄妮為達成多年好友夢想，專程返港為「世紀情歌世紀情巨星演唱會」擔任特別嘉賓。雖然短期內甄妮無意再開個人演唱會，但對於主辦商有意打造她和歐陽菲菲做「女版左麟右李」，甄妮亦持開放態度說：「等吓啦！」
於七、八十年代以多首經典金曲紅遍中港台的歌手歐陽菲菲、潘美辰、潘越雲、萬芳、黃安、林淑容、羅時豐及周治平，將於本周五及周六在紅館舉行「世紀情歌世紀情巨星演唱會」，甄妮更以「特別情商」身份參與演出。早前曾表示不會再做大型騷的甄妮肯再踏舞台，原來是為圓好友夢想。她說：「呢次搞手係我大學學長兼好友夏哥，佢一直好想喺香港搞演唱會，咪幫佢圓夢囉。雖然屋企發生咗白事，但應承咗朋友，就要一言九鼎，要有專業精神。」
陣容鼎盛 吸引參與
甄妮坦言肯參與演唱會的另一原因是陣容鼎盛，她謂：「我好鍾意聽佢哋啲歌，我喺呢行咁耐，竟然未同佢哋合作過，覺得自己好『背』，幾大都要同佢哋影張合照留念，做個小Fans先。」問甄妮是否最想與歐陽菲菲合作？她謂：「我冇問題，我好願意o架！」提到主辦商丘亞葵想撮合二人做「女版左麟右李」，甄妮笑言：「但係我啱啱先開完演唱會喎！（等你囉。）係啦，等吓啦，等吓啦。」
承認麻煩 為求安心
甄妮承認因家中有喪事推掉不少工作，包括為電視台出任歌唱比賽評判，不過她未感可惜，更謂：「呢類節目唔覺太多咩？人人都去做評判，使乜搵我？（有天價酬勞？）唔係你畀銀紙我就做，我揀嘢都揀得好謹慎，好麻煩o架。」甄妮又稱當年參與電視台的頒獎禮、紅白大賽，都熟悉每位歌手，感覺很好玩，但現在很多人不認識，對方又不會介紹自己。她說：「點溝通呀？企喺度感覺唔好，個廠又冰，人又冷冰冰！所以電視台叫我都問清楚有咩人，可能咁啲人覺得我麻煩，其實我只想安心。」
文：音樂組