鄭俊弘巫啟賢踩不死
無綫節目《星夢傳奇》除創造鄭俊弘（Fred）一唱成名的傳奇外，更讓他與評判巫啟賢相知相惜，因而結拜成師徒！談到失意時，啟賢試過因被驅逐出台灣，而令歌唱事業急轉直下；而Fred就因冇工開，淪落到要貼補習招聘維持生計。雖然二人苦鬥苦，幸好雨過天青，最終他們也在舞台上繼續發光發亮。
鄭：鄭俊弘 巫：巫啟賢 記：記者
準備充足 一唱成名
記：巫老師，一直以來你對Fred都有讚冇彈，其實係節目效果定係佢唱得好？
巫：TVB畀我咁少錢，我係唔會做呢啲效果，咁少錢就想買起我，哈哈！其實Fred真係唱得好，佢就好似一架跑車放喺跑道上，零件、所有嘢Ready好晒，一踩油就行得，唔使擔心其他零件問題，反而其他參賽者上到台仲要諗點唱好一首歌。
鄭：（害羞）多謝，其實我都唔知。
巫：唱得好嘅人係唔知自己唱得好，以前我都唔知自己唱歌好聽，直到我出咗唱片先知，哈哈！
逐出台灣 事業重創
鄭：巫老師，你事業發展都好順利，其實你又有冇試過失意呢？
巫：（慈父上身）日日都失意o架！次次叫個女Kiss我，佢都唔Kiss，所以我真係「豬狗不如」！
鄭：咁事業上呢？
巫：冇可能冇失意，初出道時，喺製作唱片過程，都試過畀人踩、同唔畀機會我。人生就好似拋物線咁，起起落落，先會精彩。要提到最慘，就係於1998年被台灣驅逐出境！因為我係外國人，有次喺台灣某個地方表演，但因為個場所冇註冊，所以就畀人告我非法演出，趕出台灣，將我台灣嘅事業一刀斬落嚟！
鄭：咁當時嘅心情？
巫：當然係失意啦！不過失意一陣就好開心，因為好耐冇放過假（大笑），事業上打擊好大，但生活上反而有另一種收穫。之後我仲記得戶口得番唔夠二千元港幣，因為我平時唔顧有幾多錢，有日我諗住去撳錢，諗住撳多啲，點知撳唔出！一睇剩番咁少錢，立即大叫：「做嘢呀！冇錢啦！」幸好我係一個識得調整心態嘅人，永遠唔諗負面。
抓撈失敗 懶理閒言
記：Fred，咁幾時係你最失意嘅時候？
巫：其實佢到依家都仲失意緊。
鄭：（靦覥笑）依家好好多啦！
巫：聽講你依家搵到好多錢喎，分你一半先，哈哈！
鄭：唔係……曾經有段時間都冇工開，但我公公以前成日同我講：「一份工搞唔掂，咁咪打兩份工囉！」結果我嘗試喺超級市場貼補習街招，雖然有人打嚟搵我，問我有乜資格，但因為我冇任何證書，只係English Native Speaker，結果一個學生都接唔到。我又試過搭搭吓地鐵，有個人喺我旁邊嗌「茄喱啡」，不過通常我都會扮冇嘢，因為每一個人嘅諗法都唔關我事，如果一啲熟悉我嘅人同我講：「唔好發夢啦！」，我諗我會Hurt啲！
巫：如果你未紅，人哋點講你都冇所謂，但你心入面一定有句說話：「老子有天一定會紅給你看！（普通話讀）」用嚟鼓勵自己。
鄭：其實有句說話，成日都喺我心入面，就係：「失意時莫灰心，得意時勿忘形。」
巫：就好似你打牌一樣，點會鋪鋪自摸，而人哋就又食胡、又自摸，冇理由唔繼續打落去！
年少被打勤學功夫
記：Fred，你個外表好腍善，其實係咪成日畀人蝦？
鄭：又唔係嘅，只係細個畀人打，所以就走去學功夫。細個喺加拿大讀書，雖然我住嗰區冇乜壞人，不過就成日畀一個外國男仔打！可能因為佢次次蝦我，我都唔出聲，但當我返到屋企，我婆婆就見到我好多瘀痕，而我舅父就要我學功夫，鍛煉自己！
記：巫老師，咁你細個有冇畀人蝦？
巫：可能我比較健康，11歲已經帶班o靚仔去爬山，好獨立，所以人哋唔會選擇去蝦我！
後記：雙面評判
訪問當天，Fred在巫啟賢演唱會中進行歌唱綵排。首踏演唱會台階的Fred，亦難掩興奮之情，唱歌時更全程投入，表現超水準！其後，啟賢亦循循善誘地教Fred歌唱技巧，又逐一介紹Fred給眾樂手認識！也許，啟賢在螢幕上是觀眾認為的毒舌評判，在螢幕後卻是扶持後輩的溫柔慈父。
文：文珊
攝：劉智源
鄭俊弘服裝：Armani Exchange