陳靜選擇性開工 錢國偉鬧爆
陳靜在微博宣稱情緒病要「閃退」而缺席活動兼不拍電影《喜愛夜蒲3》，言猶在耳，有指她昨日秘密為另一部新戲開工，陳靜「選擇性退出」的導火線，竟是不滿同片演員雨僑的戲份比她多，終於辣慶導演錢國偉開腔鬧爆：「佢揀嘢做，呢種算係咩職業操守？我唔係逼良為娼！」
今年奪香港電影金像獎最佳女配角的陳靜（DaDa），前景一片光明，豈料大前晚卻在微博宣布因情緒病要退出幕前，缺席合約活動，正當人人以為她真的有情緒病之際，昨早卻秘密為導演彭浩翔的電影開工，明顯逃拍《夜蒲3》。事件導火線原來是DaDa不滿雨僑戲份比她多，兼且不屑與同片的蕭美卡、郭穎兒在開鏡當日一齊受訪，令情緒波動。
交給律師處理
新片主角人間蒸發，導演錢國偉前日冷靜應變，還為她的健康擔心，可是乍聞她僅為了意「戲」之爭，在未跟團隊商量下便無故失蹤，即憤然鬧爆DaDa冇職業操守，據知初步計劃將改劇本令DaDa消失：「佢係清楚整個戲嘅故事，有不滿應提出研究。佢經理人（施念慈）今朝有打畀我道歉，依家連經理人都搵佢唔到，呢啲叫咩職業操守？我依家唔係逼良為娼，《夜蒲3》只係一套二級半電影，激情程度佢自己都清楚亦接受，依家仲話去咗為另一套戲開工，咁即係冇病啦！呢啲叫揀嘢做。（換角？）唔使換！我會改劇本，刪咗DaDa段戲，無形中累咗戲中演佢老公嘅王宗堯。」
至於監製伍健雄昨在電話中承認扯火要追討賠償：「我都扯火啦！搞到聽日（今日）都開唔到工。（賠償？）會，交咗畀律師處理，其實呢啲係演員基本責任，依家好似冇咗合約精神。」
《夜蒲3》原本是DaDa主動要求參演，劇組亦為她提早開工，豈料如今卻將劇組蹺起，她反而替另一部電影開工，記者向施念慈求證，她承認：「中午接到導演（彭浩翔）通知話DaDa去咗開工，DaDa呢個舉動係唔負責任，我對佢好失望。（不滿雨僑戲份多？）DaDa的確有問過我點解！」記者向彭導演了解，他只謂：「我開緊第二套戲，其他嘢唔清楚。」說罷即匆匆掛線。據知DaDa於該片屬客串性質，已完成八成戲份，自從她宣布退出後，導演本打算搵替身埋尾，怎料卻於早上與DaDa取得聯絡，最終她也現身片場。外間有指DaDa搵到大靠山，實情她沒拍拖，只是鬧情緒，不過此「鴕鳥政策」可能令她因毀約而面對千萬元索償。
雨僑成得益者
成為事件導火線的雨僑，昨日身在上海受訪時坦承是得益者：「我哋識咗兩星期唔熟，王宗堯話佢個人好直，如果唔鍾意我，佢會直接同我講。（戲份比佢多？）我哋河水不犯井水，各有各做！開會時都講明係兩個女主角，比重一樣，但我條線係同陳柏宇一齊，而佢就係三角戀，要計嘅話的確係我重戲啲。（得益？）得益幾個鐘囉！因為公司通知我遲咗開工，咪趁嗰幾個鐘去整頭，夜晚再開《夜蒲3》。」
至於「受害者」王宗堯表示會尊重導演決定。另有份參演的港姐許亦妮是DaDa、王宗堯的第三者，她表示有得拍已很開心，相信不會受影響。
文：影視組