主演《變形金剛4》（Transformers 4）的男星麥克華堡（Mark Wahlberg）近日受訪「教精」負面新聞疊疊的加拿大歌手Justin Bieber遠離大麻和「休褲」，更以「小雜種」稱呼對方，不過原來麥克華堡年少時亦愛濫藥與半裸露底褲。
麥克華堡日前於問答環節講及Justin，曾年少輕狂濫藥又入獄的他以過來人身份教路：「Justin，唔好咁曳好唔好？『休』番高條褲，令你媽咪驕傲啲！咪再掂所有大麻啊，小雜種！」雖然言詞鋒利，不過他亦語重心長表示Justin只是年少成名的年輕人，勸他別因名利沖昏頭腦，要整理生活兼學好紀律，否則會搞垮事業。
他又透露二人曾傾過合作拍電影，將來可能會成為電影拍檔。事實上，曾做歌手的麥克華堡，少時打扮與Justin甚為相似，同樣愛半裸騷肌，戴金鏈兼晒底褲邊。另外，Justin日前又於演唱會半裸露底褲，更因褲頭太鬆而邊唱邊整皮帶，而且又再搵女粉絲上台，幫對方戴「花環」摸手仔，冧到女方笑不停。
另外，Justin上周六離開夜店時又與人爭女生事。據悉當晚他與兩名女侍應齊齊離場，有一名男子Wayne Rennalls疑不服Justin將與自己調過情的女侍應帶走，即上前叫女方落車，歸還頸上bow呔，又向Justin座駕掟石，最後被保鏢制服，受傷入院。不過Wayne友人就指Wayne取回領呔後本欲離開，係Justin向保鏢「下令」，Wayne才被對方打，現時警方正調查事件，不過Justin發言人就指他未有參與爭執。
文：外娛組