Fiona「逃脫術」解緋聞
歌手薛凱琪（Fiona）與享譽國際的魔術大師法蘭茲．哈拉瑞（Franz Harary）昨日假澳門表演脫逃魔術，二人在十層樓高的半空中突然消失。由於演出時一號風球高懸又下着大雨，令危險程度倍增，處女演出的Fiona大感緊張，但最後都順利完成。
【林淑汶澳門直擊】薛凱琪昨日聯同世界級著名魔術大師法蘭茲．哈拉瑞在澳門新濠天地戶外湖畔舉行了一場驚心動魄的「Houdini Performance」亡命魔術表演，為「法蘭茲．哈拉瑞大師級魔術世界巡迴匯演」澳門演出揭開序幕。
半空消失
昨日雖然天不作美，一號風球懸掛兼落雨，惟無礙演出，表演時，首次參與魔術表演的Fiona與法蘭茲均戴上手扣被鎖進魔術箱內，其後魔術箱由吊臂吊高至十層樓高的半空，魔術箱突然「嘭」一聲在半空打開，並跌下法蘭茲穿着的鞋，二人卻消失影蹤，接着他們竟在人群中現身，震撼全場，掌聲雷動。
為了今次表演Fiona綵排了多次，前一晚更練習到凌晨兩點：「知道今日落雨更加緊張，因為危險程度會增加。（酬勞可觀？）唔方便透露，總之好可觀。」向來喜歡玩魔術的她，常鑽研小魔術，今次能與大師級表演，深感榮幸：「估唔到啲觀眾咁熱情，打風落住咁大雨都咁多人圍觀。」
日前Fiona與緋聞男友方大同被拍得疑似拖手照，她笑言：「今日係逃脫術，我個心情都好似逃脫術咁，我同佢向來唔會避忌，嗰日我哋睇住有個人影相。我哋冇拖手，方大同嘅手拎住外賣。」至於日前她與舊愛房祖名欣賞陳奕迅（Eason）演唱會，她指祖名常不在港，幾個月才見一次，祖名問她看不看演唱會順道為Eason慶祝生日，才一起捧場，而患耳疾的她睇騷時更要戴上耳塞。
驚喜生日
至於是次活動公關丁子高應大會要求挑選身手敏捷、身材嬌小的人參與魔術表演，他即想到Fiona，綵排時見她動作敏捷就知沒有揀錯人。前日生日的他獲同在澳門的楊千嬅送驚喜：「佢同我講話漏咗嘢喺房叫我一齊上去，點知成班人喺房衝出嚟，仲有十幾個中學同學，真係好驚喜！」
法蘭茲．哈拉瑞 大師級魔術世界 巡迴匯演
日期：8月9日（星期五）晚上8時
8月10日（星期六）晚上6時及8時30分
地點：新濠天地澳門君悅酒店大宴會廳
網站：www.cityofdreamsmacau.com
文：名人組