Alvin Goh巧手臣服奧瑪花曼

曾與無數荷里活影星合作的著名化妝師兼形象創作顧問Alvin Goh,憑着一雙靈巧的手,替女星奧瑪花曼(Uma Thurman)化了一個逾12小時亦不脫落的妝,令對方不禁要向他偷師,請他詳細列明化妝步驟。而女星美娜祖華維茲(Milla Jovovich)亦主動邀請他合作,可謂群星拱照!就連國際級化妝師Lucia Pieroni亦叫他到歐洲發展,但他笑道:「我係食飯o架,唔係食薯仔!」決意留港發展的他,只希望為香港注入更多「創意」。

著名化妝師兼形象創作顧問Alvin Goh曾與無數中、外紅星合作,上至一眾荷里活明星如《標殺令》女星奧瑪花曼、《生化危機》系列女星美娜祖華維茲、華語天后孫燕姿等,稱他為「星級形象顧問」亦絕無半點誇張成分。

索取化妝秘技

能躋身國際舞台,Alvin的化妝技巧及創造力當然不容置疑。早前,奧瑪花曼來港出席活動,Alvin擔任她的化妝師,其高超化妝技巧令奧瑪花曼驚嘆不已。他笑言:「其實嗰朝早我幫佢化妝,之後我走咗。點知到凌晨一點,佢保鏢打電話畀我,同我講『你到底搽咗啲乜嘢喺奧瑪花曼面上?點解過咗成十二個鐘,個妝都仲係咁靚?點解可以維持到咁耐?奧瑪花曼叫你將所用嘅化妝品牌子,同埋你化妝嘅步驟列出嚟畀佢。』真係好搞笑,不過就算我詳細咁寫畀佢,都冇可能會做到,因為每個人化妝嘅手法都唔同嘅。」

翌日,奧瑪花曼更主動致電邀請他一同逛街及用膳。被荷里活巨星賞識,Alvin固然感到非常榮幸,更難得是二人一見如故成為好友。「我哋嗰日一齊行銅鑼灣shopping,之後仲喺酒店飲香檳傾偈,我哋咩都講,提到我曾經同楊紫瓊(Michelle)合作,傾傾吓講咗啲劇本構思,佢話好想同Michelle合作,仲即刻打咗畀導演昆頓塔倫天奴(Quentin Tarantino)同佢講我哋嘅idea,而我就打咗畀Michelle,因為佢嗰時咁啱喺香港,成件事真係好搞笑好得意!臨走前,奧瑪花曼仲畀咗佢電話我,叫我下次去紐約一定要搵佢。」

幫美娜戴bra

Alvin坦言目前為止做過最滿意的作品,是三月份與美娜祖華維茲的合作,他坦言要找美娜合作絕不容易,因對方極具名氣,拍攝當天只能抽出兩小時來完成五個造型。雖然時間緊迫,但仍能拍得出色的作品,Alvin更對美娜讚不絕口:「佢真係好專業,同佢brief少少已經畀到我想要嘅嘢,佢望住你嘅眼神好似穿過你個人咁,殺死人,真係好有氣質。不過佢做嘢認真得嚟又好搞笑。拍攝時佢突然打開雙手同我講『Help me to wear the bra』,我嗰時都呆咗一呆,之後就幫佢戴咗。同外國星合作真係好好玩,因為永遠都有啲意想不到嘅事發生。」此外,還有一件事令Alvin感到非常開心,就是美娜主動提出希望與他合作。「佢其實有夾band,又會設計衫,佢同我講好想一齊合作,遲啲佢隊band嘅嘢搵我幫手搞,嚟緊九月我會去巴黎,到時會搵佢傾吓點合作。」

其實Alvin的作品能吸引大家的目光,很大因素是他不斷鞭策自己,不受制於固有的形象或枷鎖,每次的作品均要創新,務求令人眼前一亮。「其實好多時亞洲藝人嘅經理人都會過分保護個明星,我要做嘅嘢,就係說服佢哋,叫佢試新嘅造型。好似幾個月前,我同孫燕姿合作,嗰次係佢生完BB之後第一次出嚟見人,佢向來畀人鄰家女孩感覺,我破格為佢打造一個全新嘅短髮、好前衞嘅造型。fans見到佢啲相後發咗癲,甚至話『Oh my god!女神係唔可以剪短頭髮!做乜剪短佢啲頭髮!』其實大家都冇諗過佢嘅形象可以有咁大嘅轉變,引起好大回響,但燕姿好滿意,臨走前仲同我握手講Thank you very very much!」

下一步,他會與日本天后濱崎步合作,為她打造八個令人耳目一新的造型。「佢已經kawaii咗十幾二十年,夠啦!今次一定要high fashion。我依家幫佢喺世界各地搵緊高級訂造服,全世界只得一件,book咗畀佢其他人就冇得着。」他坦言並不認識對方,但由於覺得她是「Living Pop Legend」,故以電郵聯絡對方,把自己過往的作品讓她作參考,並表示希望與她合作。最終濱崎步答應了他的邀請,二人主要透過電郵開會。「我到依家都未見過佢真人,不過佢成日send e-mail畀我問進度點,睇得出佢都好期待。遲啲成個團隊飛去東京同佢拍攝。」

食飯唔食薯仔

除了被眾星擁戴外,他亦獲曾與天后麥當娜(Madonna)、藝人史嘉娜祖漢遜(Scarlett Johansson)、雅曼達施菲(Amanda Seyfried)等合作的國際級化妝師Lucia Pieroni賞識。早前Lucia來港出席Cle De Peau Beaute活動時,喜與Alvin相逢兼敍舊。Alvin更一盡地主之誼,把握Lucia坐飛機回國前的下午,帶她感受香港的文化,一同吃點心,又到廟宇求籤,度過非常愉快的時光。當Alvin向她展示自己近年的作品時,Lucia即對他說:「你點解要留喺亞洲?你嚟歐洲發展啦!我要介紹最top嘅人畀你識!」得到Lucia的邀請,Alvin坦言感到非常榮幸,但他仍婉拒了對方的好意。「畀一個咁神級嘅人讚,真係好感動。其實我唔係唔想去,不過我真係好鍾意亞洲。我係食飯o架,唔係食薯仔!」雖然歐洲佔潮流的領導地位,但視亞洲為家的Alvin,希望透過自己把「潮流」注入香港。「我覺得唔一定要定居喺歐洲,其實有工作先過去做,之後帶返香港同人分享,我覺得呢個係一個教育,希望能夠引發大家更多創意,唔好只係抄襲。」

Lucia Pieroni女星搶手

出生於英國的國際級化妝師Lucia Pieroni,曾與無數巨星合作,包括麥當娜(Madonna)、史嘉娜祖漢遜(Scarlett Johansson)、雅曼達施菲(Amanda Seyfried)、金美倫戴雅絲(Cameron Diaz)、祖娜芭莉摩亞(Drew Barrymore)等等,不少荷里活女星亦點名要找她化妝,在藝能界炙手可熱!另外,她亦獲很多著名品牌垂青,曾與Givenchy、Miu Miu、Alexander McQueen、Loewe、Vera Wang等合作,實力可見一斑。

採訪:龔凱欣

攝影:劉智源

服裝、場地:Burberry金鐘旗艦店