童星出身的Chloe Grace Moretz憑《勁揪俠》(Kick Ass)的「紫天椒」角色成名，做演員她驕傲，因其工作與別不同，但16歲的她又怕被名氣所累，識男友時擔心對方是否真心還是假意！
記：記者 C：Chloe
記：對拍拖有憧憬嗎？
C：我曾跟茱莉安摩亞傾過，我會諗那個人同自己一齊會唔會呃我，又或者因為我嘅名氣先一齊，有時就係唔可能好單純咁鍾意人，佢哋可能會利用你，所以，茱莉安叫我要小心啲，要相信自己嘅判斷，而且有時唔好太投入。你知啦！咁細個講愛情，可能拍咗拖都未知發生緊咩事。
記：父母分開同埋媽媽患上癌病有冇影響你的價值觀？
C：呢啲事令我體會到父母唔係想像中嘅神化形象，唔係由天堂而來無所不能嘅人，佢哋不過係普通人，會跌倒會痛會死，而且會犯錯會嗌交同喊，最重要係，我明白佢哋所有嘢都會顧慮到我。
記：可以分享一下工作的感覺？
C：哈哈，之前有環球電影公司高層講過笑，佢哋話鍾意同我做嘢，開會就同我講做咩，再問我對咩有興趣就得，不過有時佢哋又會話我唔似同齡嘅女仔，但我就話同朋友一齊時會似番16歲，哈哈！
記：平日生活與一般青年人有何不同？
C：其實我同其他16歲青年人都一樣，只係工作唔同，有時要着Dior高級訂製服、Chanel或者Prada時裝咁，我知道咁係一個明星，唔係一個女仔，不過，我當呢啲係工作一部分。
記：由童星出身嘅你，特別喜歡拍戲嗎？
C：我知道自己好鍾意拍戲做演員，因為上電視感覺同觀眾成為一家人，每星期走入人哋屋企，好似人家嘅小妹妹，到大個你再扮年紀細嘅角色，觀眾未必接受。
記：對演技有要求嗎？
C：我會睇番之前嘅戲，好似早前《勁揪俠》(Kick Ass)，當時我只得11歲，而家睇番就會覺好多地方唔係好啱咁，但我好驕傲因為拍戲有唔同嘅生活，成個事業女性咁！
現年16歲的Chloe一直片約不斷，近年更愈拍愈紅常跟不少荷里活一線紅星合作，包括金像影帝尼古拉斯基治(Nicolas Cage)、笑匠占基利(Jim Carrey)，型佬尊尼特普(Johnny Depp)，近期更與柏林影后茱莉安摩亞(Julianne Moore)飾演兩母女，重拍經典恐怖電影《凶靈》，又擔正拍海報，認真巴閉！另外，年紀輕輕的Chloe去年又為服裝品牌《Aeropstale》擔任代言人，似乎「錢途」無限。
出生日期：1997年2月10日
出生地點：Atlanta ,Georia
作品：《心跳(500)天》、《勁揪俠》、《雨果的巴黎奇幻歷險》
文：外娛組