陳法拉學做柔弱女人

一啖沙糖一啖屎

同鎮宇第二次合作，人哋話佢好嚴謹，事實上我仲嚴謹過佢。可能自己嗰陣鑽牛角尖、好執着細節，成日問點解，或者鎮宇都經歷過我嘅迷惘階段，好知我需要啲乜嘢指點，嗰排開工就好似去上堂咁。有時佢會臨場發揮一啲新嘅嘢刺激你去創作，接唔到就返去寫筆記檢討。有次喺廠拍攝駕駛倉，要對住藍背景靠幻想拍攝好崩潰嘅情緒，自己覺得一take OK，可以再做好啲，但導演覺得滿意已經叫大家換衫、換景，鎮宇就講咗句，你就係咁o架喇，唔係一定有take twoo架，要一埋位就中，講完就走咗去。之後我出咗廠執篋，眼淚就一路滴出嚟！呢次係我入行以嚟第一次喊，佢哋成班男人走嚟安慰我，但我就忍唔住匿入廁所喊。之後又同鎮宇拍一場好激動嘅戲，大家匿埋一邊對稿，感覺啱就拍，後來睇番片，同鎮宇、導演三個好自然咁攬埋一齊，大家都覺得好滿意，鎮宇就係咁樣一啖沙糖一啖屎。

當頭棒喝不迷惘

Chilam劇中扮演大情聖，角色輕鬆，佢畀好多空間我，我哋溝通得好好。Chilam同鎮宇相反，好多嘢唔會即場指出，但原來佢一直喺度觀察。同佢熟咗後，佢有一日同我講，陳法拉做演員、做自己都好，可以唔使咁硬、唔使咁tough，冇啲女人溫柔人哋點會鍾意你呢。Chilam又問我知唔知自己最靚、最感人就係我喊住執篋嗰一刻，佢話望住我嘅背影幾咁溫柔，楚楚可憐，呢啲咪係女人囉。聽完Chilam一番話自己都醒一醒，自己一向喺性格上、感情上都唔會有軟弱一面，但做人係咪要一味tough？唔受傷害呢？Chilam令我諗通咗做女人軟弱下都係好嘅，自己借鏡迷惘嘅何年希，明白有時做女仔太攰嘅時候，可以show畀人知你受咗傷，好多謝Chilam咁坦率嘅意見。

吳鎮宇令法拉哭笑不得，但同時獲益良多。	張智霖的一番話令法拉醒覺，要學做溫柔女人。	法拉寄情學習將感情煩惱拋諸腦後。

吸收生活「營養」

以前拍劇好忙，依家停咗拍劇，時間多咗好多。初時好唔慣，今日冇通告、聽日都冇通告、連後日都冇通告，一開始會專登搵啲嘢畀自己做，睇好多DVD、睇書、上堂學演戲、做運動、做瑜伽、約朋友食飯，習慣咗其實幾好，好享受依家嘅節奏，但都明白女演員過咗30歲係同時間賽跑，唔可以咁hea，但係又覺得不停拍劇會失去生活平衡，演員係需要感受生活。

做主角感吃力

停咗拍劇嘅呢兩個月，自己想要嘅方向反而好清晰：我要做一個演員，冇比演員更加好嘅工作！今年6月我起程去美國讀演戲，好多人會覺得突然，其實呢個念頭已經萌生咗4、5年時間，係因為當初做主角覺得好吃力，自己冇接受過演戲訓練，靠自己摸索，行咗好多彎路。做演員消耗體力、腦力，甚至消耗自己嘅感受畀觀眾，所以要去吸收營養，成為一個更有經驗、閱歷嘅演員。曾經睇過教演戲嘅書，但書本上嗰套用唔到落去拍攝，終於等到有呢個檔期去上堂，機會好難得，全世界好多人去報名，只係揀十幾個！希望成為更加好嘅演員，對演藝界有貢獻。

後記：

法拉曾在微博引用名言談及人生意義，她說如果人生是場夢，也要有一個似樣的夢。問法拉的夢怎樣才算是似樣？她簡單直接說：「自己想做一個好演員。」所謂當局者迷，假如一年前問正在日以繼夜拍劇的法拉，相信答案絕不會一樣。

口述：陳法拉

筆錄：影視組

攝影：司徒國榮

髮型：Alex So P.O.P 8

化妝：Annie G. Chan

場地：St. Betty（ifc）