猛男騷Body 震波趙勁皓 色誘連詩雅

歌手連詩雅(Shiga)昨日擔任「OGAWA易瘦通」產品的代言人,並出動男模何浩文(Dominic)和趙勁皓(King)赤裸上身示範健身動作,King更大玩「震波」令Shiga震住簽名,Shiga大呼:「好奇妙!」

Shiga以Bra-top及熱褲騷長腿性感現身,但仍不及兩位猛男騷Body露肌肉兼晒底褲邊養眼,尤其當Shiga以代言人身份進行簽約儀式時,King的胸肌就成了「合約」,當Shiga在King胸上簽名時,King即時一顯「震波」絕技,震得Shiga尷尬笑道:「見到咁大隻已經好緊張,仲會震,好奇妙呀。」

祝福方大同離巢

而Dominic和King先後踩上震動中的健身板做拉筋、掌上壓、紮馬舉啞鈴等鍛煉肌肉動作,至於穿上熱褲的Shiga亦示範幾個簡單甫士,事後,Shiga表示:「好多人都話我咁瘦唔使減啦,其實我好想練出肌肉,好似碧咸嫂有四舊腹肌。(想有個健碩老公?)有咁上下線條感覺會多一份安全感,但唔會係最主要條件嘅。」另外提到同公司的方大同已約滿華納,據知將簽約台灣的金牌大風?Shiga表示:「有聽過傳聞,但自己就唔係咁知道,都係問番當事人啦,如果係真都會祝福佢。」

至於Dominic和King「騷肌」出動是否要多收酬勞?Dominic表示:「今次係為慈善,所以收少少車馬費都唔介意。」書展終於結束,問到兩人的寫真集銷量時,King稱已售出12,000本,而Dominic則說有約11,000多本,成績滿意。

文:音樂組