偉仔醉賀葉童銀婚

葉童與老公陳國熹前晚舉行結婚25周年(銀婚)派對,好友梁朝偉、張學友及曾志偉等紛紛到賀,離開時眾人醉態盡現,偉仔累得上車後即攤在椅上,滿面通紅的學友鬼馬地以手掩面傻笑,至於逢飲必醉的志偉亦醉到半合眼,要由沈嘉偉扶上車。

葉童與陳國熹結婚25年(銀婚),前晚他們於大坑的日本餐廳包場搞派對慶祝,兩人的圈中好友梁朝偉、張學友、吳君如夫婦、曾志偉、邱淑貞夫婦及周汶錡等,都現身撐場,當中不少賓客送上名酒作賀禮。

店員擺遮陣

穿情侶裝的葉童夫婦,在派對中與眾好友舉杯暢飲,就連平時甚少夜生活及飲酒的張學友亦飲得很盡興,一行人最終逗留至凌晨12時許才陸續離開,不少人飲到醉醺醺,店員見狀即到店外擺遮陣擋鏡頭,免得眾星的醉態被拍。

偉仔步出時更頭耷耷,醉意甚濃的他甫上車便把頭挨在椅上,見記者拍照亦木無表情。滿面通紅的學友離開時,除擰歪面及拉底帽子避鏡頭,還鬼馬地掩面傻笑。

曾志偉例貓

逢飲必醉的志偉,步出時亦要沈嘉偉等扶着上車,醉到半合眼的他上車後即低頭睡着。其後葉童夫婦離開時也面紅耳赤,但亦算清醒,葉童更向記者揮手道別及舉起拇指。事後記者聯絡葉童,她表示:「好開心同咁多好朋友玩咗一晚,老公送咗心形鑽飾畀我,我都送番條手鏈畀佢,不過長度唔啱,要攞去改。」

文、攝:追蹤組