倫永亮來者不拒 開騷任人玩

「音樂才子」倫永亮(Anthony)入行廿七年,超過三百首作品,除了為自己譜曲外,亦曾為梅艷芳、羅文、張國榮等巨星創作過數之不盡的經典。常為其他歌手做演唱會音樂總監的Anthony,將再踏舞台開個人騷,他強調音樂會無Dancer、無煙花,誓要與眾同「樂」,但要求高的他坦言有不少壓力。

資深音樂人倫永亮將於8月31日、9月1日一連兩天於伊利沙伯體育館舉辦「One Voice Ten Fingers」演唱會,演唱會名稱取自他1992年的同名大碟,直譯是「一把聲音十根手指」,Anthony指很切合他的表演風格:「我好鍾意呢個名,要多謝陳潔靈畀呢個名我,佢有次喺法國一本雜誌見到呢個名,話覺得令人諗起我自彈自唱,我大部分表演都係咁。」

壓力100倍

近年Anthony多為其他歌手擔任音樂總監,有豐富經驗的他理應得心應手,但Anthony卻稱做自己演唱會反而壓力大多100倍:「晚晚聽番自己嘅歌,每次都作大修改,成日唔收自己貨。」他又強調希望這次演唱會可以回歸音樂本質:「我想做一個好『音樂』嘅演唱會,希望觀眾跟着我音樂走,成個騷冇dancer、冇煙花、冇升降台,唯一有就係我嘅音樂。」

入行廿七年,Anthony有無數經典,他坦言揀歌令他大感頭痛:「當然hit歌我會唱,不過我想將個演唱會定喺兩個半鐘頭內,(會唔會唱人哋嘅歌?)有!唱人哋嘅歌係一種過癮,例如揀咗Alicia Keys嘅《Fallin'》。」

相識滿天下

另外,問到相識滿天下的Anthony會否請一班圈中好友,如呂方、林憶蓮、杜德偉等上台jam歌?他大賣關子說:「我冇刻意去搵,但來者不拒,感激好多朋友來。」而今年是好友梅艷芳逝世10周年,有傳將會有紀念活動,問到Anthony可有收到邀請?他說:「我唔清楚,我未收到任何接觸,我都希望有啲嘢可以做,如果叫到我一定會幫手。」

文:音樂組

場地:香港銅鑼灣皇冠假日酒店

化妝:Jovy YIU @MAKE UP FOR EVER Academy