張智霖型爆chok贏頹鎮宇

以Chilam及吳鎮宇兩大型男掛帥的無綫重頭劇《衝上雲霄II》前晚首播，平均收視32點，最高35點，壓倒月前《老表，你好嘢！》的31點高開收視，暫成全年之冠。41歲Chilam扮演的「cool魔」機師造型連夜在facebook洗版，被大讚「型英帥靚正」，反而51歲的「Sam哥」鎮宇的「頹廢廚師」look被狠批披頭散髮、有眼紋。

「最憎搞內訌」

身在新加坡與家人度假的Chilam得悉收視報捷，即發微博揚言「飲得杯落」，對於被指為福將，他在長途電話中受訪時表示開心，他說：「自問都盡咗力，以前未做過呢類角色，演嘅時候誠惶誠恐，好彩大家鍾意，希望能夠繼『初哥哥』後，再創經典角色啦。（讚你，彈鎮宇喎。）千祈唔好咁講，我最憎搞內訌，有咁嘅成績全賴團隊精神。（返嚟約食飯？）咁就要等TVB安排嘞，我聽指令啫。（有人將《歲月如歌》首歌配落《衝II》度喎。）咁證明集體回憶嘅威力啫，我仍然覺得各有各好啦。」由於有指陳法拉缺席宣傳令Chilam嬲爆，如今一句「最憎內訌」似暗示與法拉友情依舊。

「飛機頭回歸」

已返內地投入電影宣傳的鎮宇亦在電話中表示收視好當然開心：「都驚收視遲啲跌番落去，好有壓力喎！其實我呢套劇嘅宣傳已經完晒，如果叫我返去幫手，或者睇大結局食飯，我會盡量配合。（網民話你頹look喎。）我未做番機師嘛，前part咪交畀Chilam囉。」

該劇監製的陳維冠亦幫鎮宇口：「唔好話邊個贏邊個輸，呢個係角色設計，劇情需要，演員都係配合。總之第四集Sam哥就回歸，『型爆飛機頭』會重現。」據悉，28日台前幕後將再次雲集出席宣傳活動，落力谷收視。

文：影視組