阿澤煮場減壓

杜汶澤近年事業發展順利,今年更首奪影帝,演技得到肯定外,更獲廣告商青睞。日前,阿澤獲連鎖快餐店「翻撻」,再度任代言人,酬勞更達七位數!除了酬勞可觀,阿澤更艷福無邊,有英皇新組合OMG五個靚女一同拍攝廣告。而阿澤更謂閒來喜歡下廚煮美食。

藝人杜汶澤十年前曾擔任連鎖快餐店大快活的代言人,今年大快活破例「翻撻」阿澤,重金禮聘以七位數再度邀他擔任代言人,多年來沒有翻用代言人的大快活表示,此舉完全是睇中阿澤的號召力:「阿澤喺facebook一個post已經有超過萬人like嘅號召力,更發現十年嚟阿澤變得更專業同成熟,敢言得嚟有深度、關心社會,係時下年輕人follow嘅對象!」

老婆現身偷師

拍攝時阿澤表情多多,為了讓導演有更多選擇,單是笑臉都做到足,又伸脷又嘟嘴,擺出多個鬼馬表情,非常可愛!今次阿澤更率領英皇女子組合OMG五個靚女拍攝廣告,廣告中六人又食又跳,當中不乏阿澤輕攬少女纖腰、與OMG勁舞的場面。玩到興起,老婆田蕊妮突然出現監場,出名錫老婆的阿澤,一見到老婆連OMG都不顧,兩公婆一唱一和向在場的總廚偷師,希望得到皇牌咖喱的秘方,非常搞笑。

「笑吓又一餐」

阿澤表示夫婦倆工作辛苦,但他依然樂於做「煮飯公」,他說:「演戲同老婆之外,我對食物最有passion,四出享受美食及下廚都係我嘅減壓良方。今次個廣告,我至鍾意『笑吓笑吓又一餐』呢句對白,好似形容我同阿田喺屋企食飯嘅情況,甚至生活態度!」

文:影視組