吳佩慈拒大S做媒

【劉慰思巴黎直擊】有「九頭身美女」稱譽的台灣女星吳佩慈,應多個時裝品牌之邀到巴黎欣賞2013-2014秋冬高級訂造服,成為各大品牌寵兒的她前日更連走三場騷及party,成為風頭躉。單身的她提到感情問題直認要求高,對好友大S(徐熙媛)有意做媒,她直言:「咪搞我!」

吳佩慈於巴黎時間七月二日連走三場活動,每次她都悉心打扮,盛裝赴會。她於BVLGARI預展派對中就穿上Ulyana Sergeenko的性感晚裝裙亮相,而該款晚裝裙正好與范冰冰以及張雨綺早前出戰康城穿着的晚裝屬同一品牌兼同系列,只是裙襬不同,跟張雨綺的曳地傘裙款式更是似足九成。

谷胸上陣的她十分養眼,夾出噴血「1」字波,她笑言這是她最大的性感尺度,有做足安全措施,她說:「唔會有危險。(如果將來老公唔畀性感,會唔會收起?)呢啲尺度OK啦!再多啲我都唔得,我諗佢都應該OK!」而品牌的代言人法國前第一夫布魯尼亦有出席撐場,英國當紅潮女Alexa Chung則在派對上客串充當DJ打碟。

直認要求高

另外,吳佩慈又應邀欣賞Ulyana Sergeenko騷,甫進場即吸引大批外國傳媒影相,她以流利英語受訪,成為風頭躉。對於貴為時裝品牌的寵兒,她謙虛地說:「唔係,我只係鍾意時裝,我鍾意設計,希望將來可推出自已同名品牌。」問到感情狀況,她坦言仍未找到白馬王子,更直認自己要求高:「肯定啦!我要求唔會低。(好友大S冇做媒人?)佢哋班朋友當然有,佢哋介紹得一定唔係好嘢,大S講過佢老公個朋友好鍾意我,當我係女神,我聽完話千祈唔好介紹畀我,我真係好驚,當我女神即係只鍾意我藝人身份,根本冇空間去了解真正嘅我,咁樣我真係冇興趣,咪搞我呀!」她還出席了Lancome派對,戴上假髮上陣的她感覺煥然一新。