朱茵知慳識儉 拒做購物狂

朱茵去年10月誕下愛女黃鶯後,終日湊女為樂鮮有工作。以為她有息影之意,但原來事業心仍在,只是不如單身時般拚搏,演戲仍然是朱茵的最大興趣。她坦言囡囡出世後改變人生觀,由昔日的購物狂變成知慳識儉的精明消費者。

朱茵和老公黃貫中(Paul)日前撇下七個月大愛女,以「奧比斯兒童大使」身份到尼泊爾探訪眼疾病童。她接受電話訪問時說:「今次真係破天荒,以前我同Paul喺工作上都合作過,但夫妻檔去探訪都係第一次。」眼見病童活於貧窮中,令他們體會「快樂真係好簡單」。朱茵說:「佢哋雖然生活環境唔好,又冇錢醫病,但佢哋活得開心,令我學識珍惜,以前唔會覺得日落係咁靚。」

讚囡囡聰明

雖然與囡囡分開數天,幸得朱茵母親出手相助,不過朱茵認為由自己照顧囡囡最好:「我媽媽實在太錫粒孫,成日就佢,我一返屋企,囡囡立即乖晒。」雖然當了媽媽七個多月,但朱茵已變成育兒專家。她說:「囡囡出生至今都係我教佢講嘢、學習,佢真係好聰明,個幾月就識發『媽』聲,四個幾月就識叫『媽媽』、『爸爸』同『Paul』,真係好神奇,雖然囡囡咁叻,但我唔會谷佢做『尖子』,唔想畀壓力佢,希望佢好開心咁成長。」

鍾意公園玩

女兒出世後,朱茵坦言自己變了另一個人。以前曾被Paul取笑是購物狂的她,買時裝雜誌亦要一次過買十多本,但現時她已沒有購物欲:「依家出街唔會再亂買嘢,唔係因為錢,而係我想身教!要畀囡囡知,做人唔好咁重物質。我帶女出街,唔會行商場,鍾意去公園玩。」她強調無意淡出娛樂圈,演戲仍然是她最大興趣,只是已為人母,應將家庭放在首位:「我唔係唔做,其實一直以嚟,都有好多工作搵我,有好劇本,我都會接,但如果要離開老公同囡囡一段長時間就唔好。」

文:音樂組