Jasmine姣黐港男 調情送波餅

本報昨日收到讀者爆料，指入圍今屆第二輪港姐面試的Jasmine Yick成日發明星夢，更經常借「佢條仔」無綫奀星黃建東（Derek）過橋，得知其選港男後更經常姣黐男方。本報就此事致電黃建東，他口窒窒表示二人認識，但否認拍拖：「係好朋友囉！我哋2010年喺海洋公園，選港男之前識嘅，當時我做司儀，佢做哈囉喂要扮嘢嗰啲人，我選港男時，佢都有做打氣團為我打氣。」

發表愛的宣言

對於有指女方整日發明星夢，Derek力撐：「佢都有做開model，好有條件入娛樂圈。（知佢選港姐？）佢之前有提過，我都撐佢。（佢成日請你食波餅？）佢對個個friend都好，係比較大情大性嘅人。」女方好姣？Derek尷尬笑說：「哈哈，唔特別覺喎，佢女人味重啲。」談到有人公開二人的照片，他即緊張地問「咩合照呀？」聞得只是正常一班人合照，即鬆一口氣說：「咁好正常，我哋都有共同朋友。（佢有男友？）唔清楚喎。（有發展機會？）唔知呀，隨緣啦，將來嘅事冇人知，不過暫時大家都以事業為重。」

而二人亦經常在facebook公開打情罵俏，更不時將搭膊、互攬、頭貼頭等親密合照「與眾同樂」，去年女方在fb張貼參加超模大賽中的照片，男方即留言:「beautiful! Kawaii!」，而男方更曾發表「愛的宣言」:「這幾年，我人生中有很多的關口都有你陪着我渡過；如今，輪到你了，我也希望戰勝你的關口，得到你想要的。放心，有我在...with Jasmine Yick」還附上二人的頭貼頭合照。

陳靜師妹變臉

另外，Sell純情的「陳靜師妹」Moonie亦被爆以前是細眼、「鞋抽」下巴，為入行不惜整容、瘦面，該名爆料者更表示她為入行，參選前即狠飛任職空少的男友Hims，之後又指他們轉玩地下情。而已退選的Rika Lau跟Hims因任職相同航空公司而互相認識，亦不時在對方的fb留言。

文：影視組