金剛色迷迷 恨嗒Mandy口水尾
名模Mandy Lieu與金剛之前傳緋聞，前晚錄影節目時二人不時打情罵俏，更不怕互傳口水，用同一隻匙羹玩遊戲，曾志偉寸金剛謂：「你估佢真係你女友咩！」其後金剛又問自稱初一不沖涼的Mandy會否換底褲，志偉即鬧金剛衰格！
Mandy Lieu、朱慧敏、黎諾懿及康華等前晚為《超級無敵獎門人終極篇》錄影，之前與金剛到日本拍《獎門人》特輯而傳緋聞的Mandy以透視裝示人，更谷胸上陣。
Mandy與主持金剛全晚成被玩對象，但二人照樣打情罵俏，Mandy出場時與金剛擁抱，獎門人曾志偉即寸金剛謂：「你估佢真係你女友咩！」
笑言事後要洗牙
Mandy前晚谷出三吋事業線，志偉笑問她的衫是否縮水，之後於吃刨冰的環節，Mandy撒嬌叫金剛幫她吃，金剛當然答應，二人更用同一隻匙羹，互傳口水，Mandy事後笑言要洗牙。
到講真心話環節，主持要嘉賓們講飲醉酒做過的錯事，Mandy說自己有潔癖，試過飲醉酒返家後即時將衣服消毒，志偉乘機又寸金剛，指他邋遢，一定「冇行」。及後大家又講做過的迷信事，Mandy指自己初一不會洗頭、沖涼及掃地，金剛口快快問她：「咁你換唔換底褲？」志偉即鬧金剛衰格，不過Mandy卻放晒電謂：「要睇同邊個去街。」
趁後生着性感衫
錄影後Mandy受訪，她說已做足防走光措施，記者指她打扮搶鏡，她笑說：「好性感咩？趁後生想着乜就着乜，唔通等50歲先着咩！仲以為自己好保守，睇就冇所謂，唔好掂就得，都係肉啫。我好玩得o架，每次上獎門人都好開心。」
文：影視組