梁漢文（Edmond）上周四和太太及友人起程到蘇梅島度假，昨午他還在微博上載其赤裸上身瞓吊床的相，但個多小時後，他就影了自己腳板流血的相，並留言謂：「我只不過從獨木舟跳下來就變成咁，真係冇嘢講。」及「好痛，打咗三支好痛嘅針，超級痛。」
Edmond接受長途電話訪問時說：「當時玩緊獨木舟，見划到好遠咪諗住跳落水游吓，點知左腳一踩落啲石度就覺得好痛，原來畀啲唔知乜插傷咗腳板，流好多血，因為怕有鯊魚，立即上水，但血不停流又好痛，最終入醫院縫咗八針。」Edmond又謂打了破傷風針及四至五支止痛針，但依然很痛，可能要坐輪椅代步，幸好旅程將完結，行程沒受大影響。