陳豪搵銀養B 天價賣月餅
陳豪娶得好腳頭老婆陳茵媺Aimee後，即獲月餅品牌斥天價，邀請他連續第三年擔任代言人，據知，陳豪人月兩團圓的幸福好男人形象，令月餅品牌非常垂青，不惜天價也要促成與陳豪再三合作，間接造就陳豪為愛情結晶搵定奶粉錢。
而Aimee主演的劇集《情越海岸線》前晚大結局，黃浩然、樂瞳、李詩韻、姚子羚、謝雪心、張國強等搞飯局慶祝，獨欠傳正身在加拿大安胎的Aimee，結局中與Aimee有咀嘴鏡頭的黃浩然笑言：「叫Aimee同陳豪埋咗今晚張單就啱嘞！（Aimee知有呢個飯局？）依家唔好騷擾佢，祝佢早生貴子！（你爆佢有咗？）聽聞佢哋有BB，戥人開心咋！我哋私下冇去到咁熟落，如果真係有BB，我會買故事教科書同沖涼玩具送畀佢哋，等佢哋多啲親子機會。」
黃德斌送學行椅
樂瞳對於同劇李綺雯劇中常以性感搶鏡，她說：「冇所謂，演員各有功用，我身材唔得，自問做唔到咁性感，我下個月27歲，等我30歲收晒水至拍寫真。做唔到樂瞳BB，做姐姐囉！」談到早前不滿唱片公司星煥，她帶弦外之音說：「公司有聯絡我，（叫你封嘴？）我係成熟孩子，簽呢間公司學到好多嘢！希望星煥同無綫配合，我唔想靜悄悄咁消失喺樂壇。」
好友陳豪成家立室，黃德斌亦為對方高興，他透露可能會送BB用品給他作新婚禮物，問到送男裝還是女裝，他就笑言：「送學行椅，男女啱用！」他表示將來結婚可能都會倣效陳豪，婚後才向大家宣布。
文：影視組