黃美棋老竇funny 踢爆露毛

香港電視女藝員黃美棋童星出身，憑cute爆外形及活潑可愛性格，被外界稱為美棋BB，孝順女美棋趁父親節將至，試整煙肉牛油果忌廉意粉及木糠布甸，準備與家人齊齊慶祝，見美棋BB手勢熟練，不消一會完成兩款作品，賣相味道俱佳！

從冇體罰

她表示向來有下廚習慣，早年在美國讀書時亦是「自給自足」，問到最叻煮甚麼？她說：「中、西餐都識，有時會整曲奇餅同菠蘿包，最好口碑嘅係泰式炸蝦丸，自己買蝦返嚟整成蝦膠，再搓同炸，個個都讚彈牙，我阿媽好嘴刁，一定要我煎嘅牛扒先食。」

入得廚房的美棋，煮了美食準備孝敬父親。

經常下廚的美棋，煮意粉最拿手。

擁有一兄一姐的美棋BB是家中孻女，當然被家人錫到燶，她表示與父母相處融洽，跟爸爸的關係更猶如朋友，每日都充滿歡樂：「早幾日一齊睇電視，爸爸突然WhatsApp話我頭頂有條毛毛，明明喺隔籮都唔同我講！佢好得意，從來冇體罰，細個時媽咪嚴啲，爸爸就比較寬鬆，就算到依家我開工收得夜，父母都唔瞓住，要確保我安全。」

切記戒驕

美棋自小已加入娛樂圈，問到父親有何忠告？她說：「佢望我要保持一顆感恩之心，千祈唔好囂，就算他日有咩成就，都要keep住學習。」至於父親節禮物，乖女美棋笑言最近已送了手提電話給爸爸，但會繼續諗驚喜。

文：立影

攝影：鄭家俊

服裝：snidel　

場地：Shall We Cook

化妝及髮型：Mani Chan＠BeautyTech