歐錦棠搭上鬼妹 互當透明

歐錦棠、「鬼妹」陳明恩、鄭至芝（GiGi）與導演鄭浩翔等，日前為快將上演的舞台劇《奪命追魂Call》排練。鬼妹飾演阿棠的情婦，因阿棠於劇中開端會死，故全程以靈魂形式出現，二人全程零交流。

唯一與阿棠做對手戲的是GiGi，阿棠透露二人有高難度咀戲：「我要咀佢，係反轉再反轉，高難度地咀，賣個關子先，要用嘴咀但又唔淨係用嘴。（太太萬斯敏監場？）唔好成日講呢啲嘢啦，佢都係演員，GiGi老公都監場，佢老公就係導演。」

歐錦棠與陳明恩等落力排練，務求以最佳狀態演好舞台劇。

歐錦棠於舞台劇有親熱場面，絕不怕老婆萬斯敏呷醋。（資料圖片）

左眼爆血管

阿棠又稱今年接了七套舞台劇加數部電影，故沒有時間拍劇：「我同無綫攞咗一年大假。（仲有約？）簽咗長約，做晒出面啲嘢先啦。」當日阿棠左眼通紅，他對此說：「已經睇咗五次眼科醫生都搵唔出原因，我入面爆咗條大血管，我試過好番，但又爆過，好彩對舞台劇冇影響。」

改變人生觀

眾人對《奪》劇銷情信心十足，阿棠說：「因為劇種少有，係黑色荒誕喜劇，而且雖然話係講鬼魂，但內涵係寫實，講手機，反映時下人際關係，我諗好多人睇到會有共鳴。」

鬼妹亦稱此劇令她改變人生觀：「因為好多人有時因為不停係咁做嘢都會盲目咗，我依家都會反思，啲人際關係會唔會做得唔好呢？同埋要keep住珍惜關係，做人要平衡。」

文：影視組