鍾嘉欣冇爭寵得人錫靠自己

愛得低調的鍾嘉欣與伍允龍早前傳分手,但女方稱與「嗰個」仍好「蜜糖」,昨日嘉欣更開腔講情史,冧爆指跟喜歡的人影輯相都好開心,不過她堅拒影裸照!嘉欣又否認與離巢星煥的江若琳不和,但自稱唔識爭寵的她坦言獲老闆愛錫。

無綫花旦鍾嘉欣昨日以代言人身份,為美容產品拍電視廣告,雖然她穿上低胸連身短裙,但胸前依然毫無睇頭。嘉欣透露剛在韓國拍畢旅遊節目回港,她說:「今次仲帶埋一男一女fans去,佢哋幫我編排行程,畀咗好多驚喜我,好難忘,係我人生永遠都會記得嘅旅程。」

孖愛人影輯相

問到男友可有甚麼難忘回憶給她?嘉欣說:「我識親啲男士都好踏實,唔會話好浪漫,最浪漫嗰次都係喺沙灘睇日出日落,我同鍾意嘅人做好簡單嘅嘢都會記喺心入面。(好易氹?)係呀,好易滿足、開心,同鍾意嘅人影一輯好靚嘅相就好開心。(影裸照?)哎吔,我唔會影裸照。」嘉欣又表示喜歡男友拿着樂器自彈自唱,問到男友是否試過時,她即尷尬掩面笑說:「唔知呀。」嘉欣自言不太着重物質,不過結婚時一定要有戒指:「同埋最緊要錫我!(搵到結婚對象啦?)點答呢啲問題。(求婚未?)暫時以事業為重,依家係衝刺期。」

8月開演唱會

對於同屬星煥唱片公司的江若琳約滿離巢,有傳是因為她不滿公司偏重嘉欣,嘉欣對此表示非常無辜:「全公司啲人唔續約、作唔到歌都關我事?我同江若琳私下好friend,冇不和。(爭寵?)傳我同欣宜爭、同許廷鏗又爭,連新加入嘅謝安琪都爭,個個都爭,點爭?都唔識爭,我只係希望做好自己。(覺得老闆偏心你?)我覺得佢錫我,但唔係特別偏心我,我自己都有努力,唔想被抹殺,嚟緊8月我會開演唱會。」

文:影視組