張母甦醒 Dicky：畀麻雀佢甩！

藝人張衞健（Dicky）的75歲母親余嘉碧，日前游泳遇溺送院。昨日約下午4點半，Dicky由秘道進入了ICU病房（深切治療部），更體貼地叫司機派發樽裝水予現場記者。約一小時後，孻仔張衞彝（Henry）亦到病房探望母親，約半小時後他即雀躍步出表示：「媽咪醒咗啦！完全清醒！媽咪好好，冇晒事好精神！」當記者詢問進一步情況時，他說：「其他嘢留畀哥哥講。」見他狀甚興奮說：「好精神！Yeah！」

仍靠呼吸儀

約晚上八時，Henry離開醫院時表示：「媽咪仲未講到嘢，因為仲插緊喉。」但他透露暫時所有數據都屬正面。未幾，Dicky終步出病房，見他雖有疲態但仍有笑容，問到是否鬆一口氣時，他說：「其實之前一直都有保留，好擔心媽咪會一直昏迷。尋日（前日）佢可以打開眼，都唔敢太開心住，因為仲未有真反應，今日一嚟到就見到媽咪完全醒咗，我哋講嘢佢都有反應。」他透露母親手腳可動但仍需要用呼吸儀器，並感謝醫護人員的悉心照顧。

攰到冇沖涼

Dicky續說：「見到我依家眼都撐唔開，好攰。尋晚（前晚）係我十幾年嚟第一次涼都冇沖就瞓。（媽咪過咗危險期？）都算係。（幾時轉普通病房？）未知呀，因為醫生呢幾日仲要做腦、肺檢查。」他笑謂張茜建議帶鮑魚給母親看，鼓勵她盡快康復，他說：「我話不如帶幾隻麻雀畀佢『甩』吓啦！」據知昨日Dicky夫婦等十多人帶同麻雀為張母打氣。而Dicky與細佬Henry亦有傾偈，都把母親放在最重要位置。

張衞健母親日前因游泳遇溺送院，現於深切治療部留醫。	張衞彝雀躍步出宣布母親甦醒。	張茜到達醫院探望。

記者致電Dicky時，他自言有為母親入院哭了數次：「媽咪愈來愈精神，識點頭搖頭，手腳都識郁。」他指母親以75歲年紀心臟兩次停頓，但在「冷凍治療」及「傅油」後能張眼，認為是神蹟十分感恩。他透露昨日有帶同修女探望母親，而他們一眾人離開時母親更寫了一句句子給她的朋友，就是「快啲返去食飯」，因她知對方一餓就會暈，可見張母十分關心別人。

問到會否考慮追究酒店負責？他說：「唔想講，想了解咗先，喺街都會仆親啦。」他又指不會阻止母親再游水：「我哋性格差唔多，我估佢會講：『阿仔，喺邊度跌低，就喺邊度起番身。』」

採訪：專案組、音樂組