Niki與父暢泳洗陰影
父親節就到，慶祝父親節的好方法，莫過於利用一部時光機，重返過去跟父親相聚。BB吳千語和周麗淇（Niki）不約而同希望回到過去，跟父親暢泳，再度歡樂一刻，Niki更希望藉此洗去心中陰影！
藝人周麗淇：《Just Gold鎮金店大中華區代言人簽約記者會》
「我想返番去10歲嗰陣，爸爸同我一齊去水上樂園玩，但係我自己行開咗玩，結果浸親，好彩畀一個唔識嘅男人救咗我。之後我喊住咁同爸爸講『我就嚟死』，自此我就怕咗水。」
藝人吳千語：《煤氣公司「萬糉同心為公益」》
「我想返去5歲第一次去沙灘嗰陣，Daddy陪我一齊游出浮台，真係好開心。」
名媛薛芷倫
「我爸爸早年因心臟病離開咗，佢過身時，我喺美國讀緊書，如果可以，我希望當日可以喺佢身邊陪住佢。」
模特兒汪圓圓：《Cle de Peau Beaute晚宴》
「我爸爸好傳統，又有大肚腩，但我睇過佢以前嘅相，佢着住喇叭褲、留長髮又留鬚，仲好瘦，同依家好唔同，我想見番以前嘅爸爸。」
名媛楊諾思
「我希望可以返去爸爸接我幼稚園放學嗰日，佢好少接我放學，當日佢開住架黃色開篷車嚟，好轟動。」
名媛翁嘉穗
「我16歲去加拿大讀書時，爸爸花咗兩周陪我去嗰邊開學，嗰兩周過得好開心，希望可以重溫呢段日子。」
藝人陳煒：《酒業發布會》
「我想去番我選美得獎嗰刻，因為我太驚，當晚冇叫到爸爸嚟睇，好想同佢分享個獎，係最好嘅父親節禮物。」
潮人黃偉文：《時尚頒獎禮》
「我作過首歌叫《單車》，係講番喺我6、7歲時，爸爸揸電單車載我去沙灘嘅難忘回憶。中國人兩仔爺好少攬頭攬頸，嗰次坐電單車就好合理地攬住佢，好想再重溫呢個畫面。」
藝人周柏豪：《名人派對》
「想睇番Daddy同Mummy結婚嗰日，我有睇過佢哋啲結婚相，但好想現場見證咁浪漫嘅時刻。」