何國鉦刻不容桓 狠心栽培

難忘

陳 = 陳嘉桓　

何 = 何國鉦

（左起）名模歐陽妙芝、琦琦和馬詩慧已嫁作人婦，行騷次數不及從前。

放大圖片

陳：好開心今次可以同爸爸傾偈。

陳嘉桓曾為「爸爸」的時裝展行騷，有板有眼。	早前陳嘉桓與師兄杜宇航跟師公葉準練詠春。	為拍打戲，陳嘉桓常周身瘀。

何：我起初真係好唔鍾意你叫我爸爸，叫到我老晒！但後來知道我仲大過你親生老竇就冇辦法啦，唉，不過都好嘅，無啦啦可以多咗個女。

陳：我仲記得我哋第一次見面可算「一見難忘」。

何：你嗰陣得16歲，你當時嘅老闆向我推薦你，我就嘗試直接打畀你約時間見面，點知你隨手將個電話畀咗助手，我當時真係好嬲，我心入面諗：你算係咩態度？

陳：我當時好細個，冇經驗嘛，唔好嬲我啦！

何：我其實可以由得你，不過見你都肯受教，所以都解釋番畀你知點解唔可以咁做，講到底你畀我嘅第一印象真係好差，我係塞錢入你袋，如果話你唔聽就你蝕底，但你又出奇地咁聽話，所以之後大家就熟咗，唔再單單幫你打造形象，仲會帶你出去識吓人，認識吓個世界。

陳：所以我不嬲都話爸爸對我好。

何：如果你係唔得嘅，我就唔會帶你出嚟啦，你估我唔怕你影衰我咩，而且我同你咁夾都係緣分嚟嘅！

私心

何：其實我咁鍾意你都有私心o架！

陳：竟然？咁係咩呀？

何：我成日做騷都搵唔到模特兒，當時有人同我講話想捧你做打女，但我認為你唔單單識打功夫，無論樣貌身材都絕對啱晒行天橋，既然你有天賦本錢，唔好嘥咗佢，將先天優勢喺個騷度用盡佢。

陳：我有咁好咩？

何：依家香港模特兒界已經青黃不接，之前琦琦、馬詩慧、周汶錡嗰啲都嫁晒人，本地人出現真空，以中國人有你呢個高度已經好少，同埋娛樂圈競爭大，喺模特兒界就冇人同你爭。

陳：咁我有冇機會做到Supermodel？

何：呢幾年嚟你真係愈來愈好，由第一日唔識行騷，見你不斷畀心機練，到依家行出嚟有板有眼。你唔係琦琦，佢有自己天分，一埋位就自然；你就勝在肯學、有進步，最緊要係你依家先得20歲女，絕對有排玩。

陳：其實我都有打算專注喺Model界發展。

何：咁你要落多啲心機接觸，因為你畀人感覺唔夠專心，似得閒先做嘉賓model，好難叫人信你係專業。但我睇到你有天分，雖然起初係有啲生硬，不過呢個係每個人嘅必經階段。

雕琢

陳：一路以嚟全靠爸爸你睇住我啫，不過講到底你絕對係一個嚴父。

何：帶得你出去就要對你同對自己負責，你見我唔係個個新人都帶。

陳：我喺你身上學到好多嘢，亦知你幫咗我好多，我係本地模特兒入面最細個去行你個台，當時心情勁緊張，怕行得唔好會失禮你。好記得有次做綵排，你一直都話我行得唔好，其他一齊行嘅模特兒都已經喺台下坐低食緊飯，但我自己就要一個人來回再行，行咗好多次你都唔收貨，嗰刻覺得你好狠。

何：但我狠之餘，同時都畀好多靚裙你着喎！其實一路都有人話你唔啱做模特兒，但我覺得你就好似一塊未雕琢嘅瑰寶，只要畀啲時間、心機就得，依家見到你行出嚟有自己風格，側邊啲人讚我好眼光，呢個滿足感其實仲大。

陳：可能一路畀你逼得多，同時令我自信壯大咗。

何：所以依家都會由你去行壓軸。其實我都發現曾經有做錯嘅地方，開頭想幫你塑造成熟形象，但又發覺普羅大眾鍾意你夠年輕同成日笑，咁我仔細諗番又覺得你仲未夠廿歲，無理由掩蓋你嘅童真，所以都係行番後生一啲嘅Style。

陳：爸爸，咁你覺得我仲有咩應該改善嘅地方？

何：最緊要觸摸到神髓，你本身條件夠好，可塑性高，可以作多元化演繹。

嘮叨

何：雖然你仲係單身，但我從來唔擔心你嘅終身幸福，咁靚女實大把人追。我平日接觸女仔仲多過男仔，所以如果要我介紹男仔畀你識真係要排隊，哈哈！不過真係驚啲人睇完戲會覺得你好似好粗魯咁，但其實你唔係囉。

陳：係呀，有時拍戲難免會有瘀傷，初初啲化妝師唔知我拍打戲，成日以為我畀人打，嚇親佢哋，要幫我遮瘀。

何：咁麻煩你平時都錫身少少，唔係嘅話着幾靚嘅衫都唔好睇。

陳：我知道o架啦，長氣爸爸！

筆錄：影視組

服裝：Doll By Dorian Ho