祖師十指緊扣驚動警察
天后容祖兒和劉浩龍（師兄）公開戀情後不時被拍得Sweet拍拖，前晚兩人又再約大班朋友開餐，離開時肉緊地十指緊扣，有男友在身邊的祖兒化身開籠雀，紮紮跳行樓梯，師兄則全程護花，拖到女友實一實，及至發現記者，原本溫馨的一晚搞到要警察調停收場。
容祖兒和劉浩龍前晚於中環歌賦街拍拖食日本串燒，深夜十二時劉浩龍先行步出餐廳，細心地四處張望，未幾祖兒保母車由司機駛至餐廳對出的樓梯底，並開定車門等候。經師兄探路後，穿短褲露長腿的容祖兒步出，只見她一手拖實男友，兩人十指緊扣，企在餐廳門外，其時張敬軒、黃偉文及數名友人相繼步出，原來祖兒和師兄拍拖再次玩集體活動，搵定一班電燈膽開餐。
霍汶希證祖兒冇報警
有男友在身邊的祖兒這晚化身開籠雀，行樓梯時不停左擰右擰和朋友傾偈，至於師兄則緊張萬分，全程護花，拖到女友實一實。及至發現記者，兩人即時鬆開手，並且急急腳登車離開。記者尾隨祖兒保母車駛至司徒拔道時，車子突然停定在路邊，不消兩分鐘，有警車巡經，警察馬上落車了解，祖兒司機向警員投訴記者追訪，警察抄低各司機資料後放行，祖兒和師兄直駛往祖兒香閨。其後記者致電祖兒經理人霍汶希了解，她表示：「經了解，知道祖兒架車喺迴旋處前停低，咁啱警察經過查問，我可以用人格保證祖兒冇報警，以佢嘅為人唔會想搞大件事。」
張敬軒呻藝人拍拖難
有份出席飯局的張敬軒昨日接受訪問大讚「祖師」體貼，指兩人在飯局上沒有太親暱舉動，不會令朋友眼冤，講到報警事件，軒仔說：「之後我有同祖兒傾番電話，佢話冇報警，應該係啲路人唔知發生咩事，所以先報警啫，藝人拍拖真係唔容易，希望外界畀多啲私人空間佢哋啦！」
文、攝：追蹤組