梁思浩要與翁美玲冥婚 湯鎮業：娛圈恥辱
由梁思浩及岑寶兒（阿夢）主持的有線靈異節目《怪談》雖被指導人迷信，但多年來不乏捧場客。最新一輯為谷收視竟玩無可玩，兩人計劃與已故多年的藝人翁美玲及鍾保羅冥婚，被外界狂罵對死人不敬！翁美玲生前男友湯鎮業得知後怒氣沖沖，狂轟此舉呃神騙鬼：「簡直係娛樂圈恥辱！」
有線昨日正式重組電視頻道，叮走24小時娛樂新聞台，推出新頻道「高清奇妙台」和「高清奇寶台」。昨日梁思浩、阿夢、盧海鵬及多名主播到尖沙咀坐巴士巡遊造勢，眾人在酷熱天氣下向市民派扇，大汗疊細汗。
將在奇妙台播出的長壽靈異節目《怪談》多年來玩盡闖鬼屋、墳場、介紹巫術、招魂等踩界題材，現由思浩及阿夢主持。思浩講明為谷收視及幫有線爭取免費牌，於八月播出的新一輯，將會與已故藝人進行冥婚，對象分別是1985年開煤氣自殺的「歷代最美黃蓉」翁美玲，及1989年跳樓自殺的名主持鍾保羅（Paul）。
唔敢搞哥哥阿梅
思浩說：「搞冥婚係高層諗嘅，五十年來都冇呢樣嘢，我哋計劃一係岑寶兒嫁鍾保羅，一係我娶翁美玲，最後阿夢抽籤輸咗要做，呢個月底會搞，準備Book靈堂喇！」思浩透露監製曾提議與「哥哥」張國榮及梅艷芳冥婚，但怕兩人歌迷不喜歡而擱置，並指已找到鍾翁二人的骨灰位。問到有否問准他們家人？思浩說：「有嘗試過搵Paul屋企人，如果佢哋反對，會再開會討論。我哋都有搵過梅媽，佢OK，仲開出咗啲要求，但最終符合唔到佢。」
未嫁人的阿夢承認要冥婚感害怕，問擔不擔心影響日後嫁人？她說：「思浩話如果嫁唔出會娶我，其實將呢種親身經歷帶畀大家係好值得。」他們又指Paul生前未婚，今次當是幫對方完成心願。思浩更指若反應好，他亦會與翁美玲舉行冥婚。
冥婚構思引來外間狂轟，被批不尊重已故藝人。曾和翁美玲拍拖的湯鎮業身在內地，得悉事件後大發雷霆：「唔只我，一般人聽到都唔舒服啦！呢個題材完全係炒作，呃神騙鬼！佢哋（梁思浩與翁美玲）咩關係啫？三唔識七，為乜呀？收好多錢呀？始終人都過咗身，要尊重人哋家人。佢哋都有好多Fans，有冇顧及其他人感受？簡直係娛樂圈恥辱！」他又斥做節目不應擺死人上枱。問到當年有否打算跟翁美玲冥婚？他表示沒有，認為感情放心中便可。
想幫人完成心願
有線方面則另有睇法，問《怪談》監製佐治會否怕被鬧？他說：「只係想做得更多元化，呈現冥婚呢件事出嚟，我哋係幫人、當功德咁做。（畀人話抽水？）會問准離世家人同意先做。其實Paul有好多心願未了，我哋想幫佢完成心願。」有線高層曾展章亦指製作電視節目會Set底線，但原來是指靠問米：「節目部同事曾通過靈媒了解靈界情況，真係唔得係唔會勉強。」
文：影視組