As One出擊求愛

跳唱女子組合As One年紀輕輕難免滿載少女心事,談到感情事,她們都異口同聲鼓勵新一代女仔要敢愛敢恨,遇有心儀對象更要主動出擊,四人都深信「戀愛係要自己爭取」,成員Elfa更笑指已將愛人「追到手」!

由黃柏高力捧的As One以青春可人的形象風靡不少年輕粉絲,早前她們就推出第三首主打歌,新曲鼓勵少男少女要勇於求愛,感同身受的Nata表示:「好多女仔遇到心儀對象都會左諗右諗,但機會往往喺猶豫嘅時候溜走。」在旁的Shin補充:「如果太顧面子,幸福就會錯過o架啦!」深感認同的Oli笑說:「絕對唔可以怕醜!」問到四女現階段可有對象?Elfa笑言:「我依家同Shin、Nata同Oli拍拖。」

出首張唱片

出道已有一段日子,四女亦即將推出首張唱片,她們又笑指自己「未婚產子」,對於臨盆在即,Nata直言:「我好鍾意跳舞,由細細個開始跳,但真係諗都冇諗過自己會有一日出碟!」而Oli就期望「寶寶」能為身邊人帶來快樂,她表示:「我跳舞都係希望帶畀人開心。」

互相爆瘀事

雖然四人年紀輕輕,但日跳夜跳都難免患上「職業病」,Shin大呻:「有時候懶唔拉筋就直接練習,不時會Chok親條頸!」在旁的Nata即Chok住頸說:「佢成日撳住條頸喺度嗌痛,可以嗌足一日。」而Elfa又隨即大爆:「Nata都成日左腳kick右腳四圍仆o架!」

文:音樂組

攝:司徒國榮