劉嘉玲艷壓裙芳
第66屆康城影展正進行得如火如荼，數以千計世界各地女星「裙」情「胸」湧，為的是在紅地氈上成為全球焦點，爭妍鬥麗。無論最後獎項花落誰家，眾女星都盛裝赴會，值得嘉許，著名星級造型師郭慶彬（Ricky）力讚劉嘉玲、Nicole Kidman與Cindy Crawford憑貴氣登上The best of the best寶座，屈居之後的Emma Watson則流露半熟少女味，而Carey Mulligan則表達出簡單就是美，各顯綽約風姿。
劉嘉玲 Lanvin
Metallic金好有霸氣，剪裁唔算貼身，但好凸顯到佢嘅優美線條，而大蝴蝶領位係亮點所在，佢最醒目係梳個貼服髮型同配襯一對鑽石耳環，唔會too much，簡約高貴美。
范冰冰 Elie Saab
全黃色設計望落去幾fresh，但腰線過高，令佢望落去腰短，唔合乎佢身形比例，感覺有啲怪，但着淡色衫唔一定要化個濃妝，太過成熟，好濃妝艷抹，嘥咗條裙。
張雨綺 Ulyana Sergeenko高級訂造服
今季好興綠色，但佢着得好娘，而且佢本身唔係瘦，加上裙襬太寬闊，顯得佢下半身偏大，加埋騷胸設計，整體感覺好臃腫，加埋條粗眉，顯得佢好惡，佢想營造復古味，但好唔襯佢！
Nicole Kidman Christian Dior高級訂造服
佢係最靚，好似將花園放喺身上，色彩繽紛又夠夏天feel，加上呢款好似dolly sharp剪裁好啱佢，最絕佢襯咗對尖頭鞋，唔需要首飾都一樣搶眼又高雅。
Emma Watson Chanel高級訂造服
黑白配好簡單，裙嘅廓形簡約修長，露背設計，低調見性感，望落去好舒服，雖然無佩戴鑽飾，又化個淡妝，但好有光芒，着出簡單的半熟少女味。
Carey Mulligan Christian Dior高級訂造服
素色設計好簡單，主要係玩身形線條，多一啲肉都撐唔起，佢無佩戴鑽飾，感覺好clear好乾淨，加埋中間分界微曲嘅髮型，完全sell自己天生本錢，表現出簡單就是美。
Cindy Crawford Roberlo Cavalli
以佢嘅年紀，仲keep到葫蘆身形，呢款貼身設計完全騷到佢花樽身形，成條裙好似為佢度身訂造，騷胸得嚟一啲都唔低俗，成件事好靚，好高貴。
Profile
著名星級造型師郭慶彬（Ricky）曾遠赴米蘭與巴黎時裝周，出席品牌有Max Mara、Sportmax、Chanel、Valentino、Gucci與Jean Paul Gaultier等品牌，曾被邀在中國時尚節目《美麗俏佳人》擔任嘉賓主持，近年也被各大品牌邀請客串造型顧問，為VIP提供服飾資訊與配搭技巧。Ricky曾為李冰冰、吳君如與張惠妹等擔任造型師，地位被肯定。