古巨基一夫三棲
80年代是香港樂壇全盛期，在這個黃金盛世年代，各種音樂風格百花齊放，當時得令的歌星如張國榮、陳百強與譚詠麟等位位都形象鮮明。不過，隨着時代轉變，昔日香港樂壇的風華盛世亦隨之而落幕，歌星也逐漸轉型拍戲，樂壇更一度被指是夕陽工業。熱愛歌唱事業的古巨基都曾參演不少電影，並認為作為全能藝人，能歌、影、視三棲發展亦不是壞事。
設計首飾撈過界
同古巨基做訪問，會發覺他周身刀，拍戲、唱歌，以至設計男裝都難不倒他，他自言是勇於新嘗試挑戰自己。今次基仔再撈過界，首次為金至尊任客席設計師，設計名為「寵愛‧愛麗斯」鑽飾系列。
基仔說這次經驗令他對珠寶首飾設計有更深認識，更笑稱其實做埋阿四，由拍攝宣傳照與產品包裝都一手包辦。問基仔靈感從何來？他說是自己想像出來的角色Alice Wild：「每個創作，我都會先有故事人物同角色，繼而再引伸出性格同背景。Alice Wild係我想像出嚟，佢好鍾意大自然，突然放棄大都會生活，跑到郊區生活，住喺個秘密花園，嗰度有小動物同豹紋狀樹葉，係個夢幻奇妙旅程。」基仔更笑稱將來結婚也會充當自己的婚禮統籌，由場地布置至結婚戒指的設計都親力親為，定必要為另一半打造出畢生難忘的完美婚宴。
歌影平衡發展
我起初都係做演員，主要拍劇，之後就開始接拍電影，但我好鍾意唱歌，喺機緣之下我仲成為歌手，好開心，之後我一心發展歌唱事業，將個比重放喺音樂上，有時間都會接戲拍，過吓戲癮，會作唔同嘗試。
四年冇拍電影
其實我都有四年冇拍電影，對上一部電影係同阿Sa（蔡卓妍）合作嘅《甜心粉絲王》，但今年會喺音樂同電影兩邊取得平衡，會接拍番電影，依家我都有同一啲導演同編劇見面。
音樂市場有變
依家整個樂壇氣候，無可否認冇80年代咁風華盛世，但我覺得音樂市場一定需要，只係存在嘅方式同以前好唔同，樂迷之前會買錄音帶同唱片聽，但依家進入另一年代，唔好話廣東歌，就算華語歌、英文歌，甚至其他外語歌，好似日本歌同韓國歌等都進入數碼市場，大家會喺網上下載，已超越傳統賣碟方式。
歌曲激發創意
其實係整個音樂市場嘅運作方法唔同咗，只要搵到渠道繼續運作，歌係需要，我唔相信將來會冇歌聽，音樂係可以抒發情感，亦有助紓緩壓力，甚至可以激發創意，歌係陪住我哋每一個人成長，人係需要音樂，亦係生命中唔可以缺少。
籲歌手多嘗試
好多歌手依家都接拍電影，唔係今時今日嘅事，好耐之前已經存在，好似當年四大天王，佢哋都有唱歌同拍戲兩棲發展，唔可以話新一代歌手個個轉型做演員，只係嘗試唔同嘅嘢，兼顧多一瓣唔係壞事。呢個現象係時代轉變，藝人除咗唱歌，有演戲天分不妨去拍戲或拍劇，可以多元化發展。
搞笑化正能量
如果問我最想拍邊類型電影，係喜劇，因為世界好多不如意事發生，要更多歡笑聲轉化為正能量，令人感到人間有愛同希望，攞唔攞獎唔重要，拍到一套令人開心嘅電影更有意義，我覺得咁至係代表作。至於最想同邊個合作，當然係張家輝，因為我哋私底下認識，對佢有份親切感。
自嘲用腦太盡
古巨基雖然是獅子座，性格卻像處女座般追求完美，比較執着，一旦下定決心做一件事，便會做到最好，他說：「我會連覺都唔瞓，不停諗點樣先做到最好，其實唔係唔想瞓，只係諗到瞓唔着，我都覺得自己用腦太盡！」
在生活上遇上的一句口號，一首歌曲，甚至一段對白，都會為基仔帶來無窮藝術創意，他說：「我好留意每樣細節，即使係文字都可以將佢畫面化。」基仔沒有藝術家的怪脾性，卻有藝術家那份堅持到底的執着。
採訪：劉慰思
攝影：劉智源
化妝：NatalieSoo.ki （D-mop beauty by ND&Co.）
髮型：Coren Cheung@hair