鄭希怡收火傾蜜月之旅
尚有半年就嫁為人妻的鄭希怡（Yumiko），日前化身親民老闆娘，到未婚夫梁學儲（Andy）的化妝學校打點。拍拖多年的二人儼如老夫老妻，雖然激情不再，卻甚有默契，兩人更邊歎下午茶邊傾蜜月之旅，Andy亦醒目地細心聆聽，免得再為籌備婚事意見不合而開火。
鄭希怡和拍拖八年的化妝師男友Andy定於今年11月拉埋天窗，兩人早前雖為籌備婚事稍有爭執，不過兩人話咁快就回復恩愛。日前Yumiko以老闆娘身份到未婚夫開設的化妝學校打躉，穿便裝的她獨自上樓，見到公司職員即有講有笑，完全沒老闆娘架子。
了解店舖運作
Yumiko先走到一旁將店內的化妝品逐一拿上手檢查，並不時為化妝品「執位」，又與一女員工討論化妝品的擺位，顯然對店內運作瞭如指掌。過了一會，Andy終現身店內，女員工即醒目退位，讓兩人「夫妻檔」收拾餘下的手尾。Yumiko見到男友後雖未有親密舉動，但明顯心情立刻變靚，不時大笑。
邊歎茶邊密斟
結婚花費甚大，Yumiko當然要幫男友店舖「睇數」，只見她埋頭打理帳簿，非常認真，不過Andy亦不願女友傷神，不消一會就拉Yumiko落樓歎茶。到達店舖，Andy先負責買飲料，Yumiko則搵位坐下看iPad，原來在挑選蜜月地方。Andy認真聽女友發表意見，似乎Yumiko已鎖定幾個目的地，兩人愈傾愈埋，看來對蜜月之旅達成共識，不用再嗌交收場。
文：音樂組