里奧仔被嫌老Cara唔受溝

荷里活型男里奧勒度狄卡比奧(Leonardo DiCaprio)食女無數,女友全是名模級數。不過里奧仔於康城就慘被20歲新進名模Cara Delevingne請食檸檬,全因女方嫌大她18年的里奧仔老!

有「名模集郵男星」之稱的里奧仔,前女友如超模Gisele Bundchen、Bar Refaeli及Erin Heatherton等全是模界數一數二的索女,不過里奧仔撞正以性格見稱的Cara就失手收場,更被Cara嫌老!

僅交換電話號碼

據知,里奧仔於新片《大亨小傳》(The Great Gatsby)的首映後派對睇中同場的Cara,知情人士稱:「通常里奧仔只要望實個女仔,之後個女仔就會送上門,不過Cara例外!佢當晚全程跟住女方,傾偈時里奧仔就邀請Cara去佢住嘅地方,不過佢哋只係交換電話號碼咋!」

知情人士又指Cara全程都想避開里奧仔,在場人士都看見她拒絕一位世界巨星的追求。知情人士續稱:「Cara覺得里奧仔太直接,同埋太老,年紀相差18年。」而Cara已離開當地飛到紐約,更於當地紋第二個紋身。

艾哲倫當街咀嘴

另外,金像影帝艾哲倫保迪(Adrien Brody)大前日宣傳新片《Third Person》後,與女友Lara Lieto留於當地。前日二人行街時,情不自禁當街咀嘴,Lara更於當地買珠寶。而到當地宣傳新片《太極俠》的奇洛李維斯(Keanu Reeves),於一私人派對上與一名金髮女子有講有笑,更邊飲香檳邊看海談心。全程微笑的奇洛,與一向憂鬱形象非常不同,更盛傳疑似撻着對方。

文:外娛組