Kary坐正sweet爆：有時間咪去咯！
歌手吳雨霏（Kary）與余文樂撻着後，絞盡腦汁融入樂仔家中及其社交圈！昨日，《好報》獨家踢爆Kary早前獲樂仔急召入西貢，陪樂妹余文琪及好友食糖水，Kary更發揮交際手腕與樂仔好友打成一片，氹得樂仔離去時情深拖實她上車。對於名正言順穩坐「樂嫂」寶座，Kary昨晚現身時直認樂仔每逢與朋友聚會，都會主動邀請她出席，看來「樂霏戀」打風都打唔甩。
余文樂與吳雨霏自去年底在台灣拍MV秘撻後，盛傳在這段關係中採取主動的Kary，除對男友千依百順及落力融入余家外，更出盡法寶進佔男友社交圈，更被《好報》踢爆她如何以高超交際手腕融入樂仔朋友圈實況！
日前獲樂仔急召入西貢的Kary，悉心打扮以「喜愛夜蒲」look現身，陪樂妹余文琪及眾人在甜品店邊食邊吹水，期間樂仔掛住講電話，Kary即展示交際手腕，與樂仔友人風花雪月講足全場。眾人在甜品店約逗留半小時離開，警覺性甚高的樂仔，先刻意與男友人並肩而行，任由Kary墮後做背後女人，不過，當步入人煙較少的停車場後，樂仔即投以深情眼神及拖着女友上車，讓她名正言順安坐「樂嫂」寶座予以獎勵。
兩人互相遷就
對於坐正做樂嫂，Kary昨晚為下星期舉行的音樂會綵排時，直認樂仔每逢有朋友聚會都會預她一份：「佢有聚會都會主動問我有無時間一齊，我有時間咪出去咯。」她又指與樂仔其實互相遷就：「我份人係無乜所謂，但其實主要都係互相遷就。」談到與樂媽關係，Kary先撒嬌指記者不要稱呼樂媽做其未來奶奶，又指之前有空便會與對方見面飯聚，她說：「都係好正常見面。（Auntie好鍾意你？）唔知道，近來忙啲，少啲見。」至於樂仔，則透過電話表示「私人嘢唔回應」，更忍不住哈哈大笑，看來他與Kary果然打風都打唔甩。
文：專案組
攝：追蹤組